Huntawp dawnah Tottenham chhuanvawr Harry Kane chuan chakna goal a khung a. Manchester City khelmuala inkhel hmuhnawmah Premier League champion lai 3-2 in an hneh.
Etihad Stadium-ah City hian point an hlawhchhuak dawn niin an ngai hman a. Video Assistant Referee hmanga endik hnua an penalty hlawhchhuah chu Riyad Mahrez-a’n minute 92-naah goal-ah a chantir.
Mahse inkhel tawp hma in nipui laia lakluh an tum Kane a inlar leh a. Minute 85-naah khel\ha Dejan Kulusevski ball cross chu goal-ah a tauh lut.
City in Spurs hi vawi hnih an chhanlet a ngai a. A vawithumna turin hunin a daih tawh lo.
Tottenham in minute 4-na lekah goal an khung a, Son Heung-min chuan Kulusevski goal khung tur a siamsak a. Swedish winger in a club thar tana a goal hmasa ber a khung.
Minute 33-naah City in goal an khung a, Spurs goalkeeper Hugo Lloris chesualin Raheem Sterling ball cross a man thei lo. Ilkay Gundogan chuan remchangah la in an si phurh a sut.
Second half-ah Spurs an hlauhawm chhunzawm a, minute 59-naah Kane leh Son te inkawp a\angin English striker in goal a khung leh a. Ederson-a’n a goal khung belh tur a dan bakah goal khat pawmsak loh a nei bawk.
Huntawp dawnah Cristian Romero penalty chawi chu City in an vanneihpui dawn nia a lanlaiin an lakluh tak loh Kane-a’n danglamna a siam.
“Ball kan chan apiang khan kan hlauhawm”
Tottenham manager Antonio Conte chuan, “Manchester City lakah chuan ball chan a tam dawn lo tih a hriat sa. Mahse ka player-te hnenah goal in ven pawhin in rilruah goal nawr a awm reng tur a ni tiin ka fuih.”
“Hei vang hian a tawp dawnah pawh khan an goal khan min ti hnual vek thei a ni a, mahse keimahni zawkin chak duhna in kan hneh.”
“Ball kan chan apiangin ka team in nawr an duh a, kan hlauhawm ziah bawk.” tiin an inkhel a thlirlet.
Manchester City manager Pep Guardiola chuan goal hmaah hriam zawk an mamawh tih a sawi ve bawk a. “Kan khel\ha in ka hria a, chance pawh kan insiam hnem. Chak thei kan nih avangin sawisel tur a awm lem lo. Kane kan hrechiang a, chance insiam ve bawk mah ila Lloris a khel\ha bawk. Goal hmaah kan hriam zawk a ngai.” tiin inkhel a thlirlet.