UK Prime Minister Boris Johnson chuan finfiahna an neih atanga thlirin Russia chuan kum 1945 hnu lama Europe-a indona lian ber thlen a tum niin a sawi.
BBC-a Sophie Raworth-i’n a kawmnaah, “Thil hrang hrang thlirin inruahmanna lian tak chu an tan tawh a ni,” a ti.
Intelligent-te atanga a hriat danin Russia chuan Ukrainian khawpui, Kyiv hual vel chu rûn a tum ngei niin Johnson-a chuan a sawi.
“Mite hian mihring nunna hlutzia an hriata boruak inmung titawp tura tan an lak a ngai hle,” a ti bawk.
Prime minister hian Munich-a khawvel ram hrang hrang hruaituten kum tina tih thin dana venhimna lam sawihova intawhkhawm an neihna hmun atanga he thu hi sawi a ni.
United States-in a chhut dan chuan Ukraine ramri-ah hian Russia chuan a sipai 1,69,000 leh 1,90,000 inkar vel a chhawp a. A sipaite hi a ram chhung bakah an thenawm, Belarus-ah a dah a, a sipai zingah hian Ukraine khawchhak lama inlah hran tum pawl hel chhiar tel an ni.
Johnson-a chuan Russia hian a rûn a nih chuan tun hma zawnga a la tih ngai loh angin a hrek tur thu a sawi.
UK leh US chuan Russian company-te chu ‘pound leh dollar-a an sumdawnna a dansak dawn’ nia sawiin chu chu an tuar hle dawn niin a sawi bawk.
Minister thenkhat chuan UK-a Russian-te leh an sumdawnna thlenga hrek an nih tur thu hial an lo sawi tawh.
Khawthlang ram thuneitute chuan tun hnaia an inbuatsaih dan thlirin Russia chuan eng hunah pawh Ukraine hi a rûn thei reng niin an sawi a. Russia erawh chuan hei hi phain a sipaite hian ramri-ah hian nunchan an zir mai a nih zawk thu a sawi.
Russia hian a sipaite a hnuk kir tih sawi a awm hnu lawkah a thenawm ram hi a run tho ang em tia an zawh chuan Johnson chuan, “Finfiahna kan neihte hi a takah a thleng ang tih ka hlau khawp mai. Tuna kan hmuh leh hriat china a lan dan chuan inruahmanna thenkhat chu kalpui ngei a ni,” a ti.
Prime minister hian US President Joe Biden-a chuan khawthlang ram hruaitute hnenah intelligent report an dawn atang chuan Russian sipaite hian khawchhak lama Donbas atangin Ukraine hi an lut dawn lo va; Belarus leh Kyiv chhehvel atangin an lut zawk dawn niin a hrilh tih a sawi.
Johnson chuan, “An inruahman dan kan hmuh chinah chuan an tam dan thlirin kum 145 hnu lama Europe-a indona lian ber a thleng ang tih ka hlau,” a ti.
Mipuite chu Ukrainian tam takin nunna an chân tur lam ringawt ni lovin, ‘Russian thalai tam tak’ pawh an thi dawn a ni tih ngaihtuah tel turin a ngen.
Johnson-a hi Munich-ah hian Ukrainian President Volodymyr Zelensky nen inkawmin an inkawm zawhah BBC hian a kawm ve a. Intawhkhawma thu a sawiah Russia-in Ukraine a rûn a nih chuan khawvel a nghawng dawn tih a sawi.