Siaha khawpui atangin ramdaidep chi (species) thar hmuh chhuah a ni a. Siaha hmingchawiin Crytodactylus Siahaensis tia vuah a ni.
Developmental Biology & Herpetology Laboratory, Department of Zoology, Mizoram University-a Head of Department ni mek, Prof. H.T. Lalremsanga leh a thawhpuite chuan Siaha, Palak National Wetland leh a chhehvel ramhnuaia amphibian leh reptile te an zirchiannaah an pianhmang (morphology) leh chifang (DNA) atangin ramdaidep, Cyrtodactylus (Bent-toed Gecko) chi thar hmuchhuakin, a hmingah an hmuh chhuahna, Siaha khawpui hmingchawiin a scientific name atan Cyrtodactylus Siahaensis tiin an vuah a. A common name atan Siaha Bent-toed Gecko tiin, a tualchhung hming (local name)-ah ve thung chuan Mara tawnga Ramdaidep sawina, ‘Khotlia’ ti a vuah a ni.
Hetih rual hian, Prof H.T. Lalremsanga leh a thawhpuite tho hian Umroi Military Station, Meghalaya atangin ramdaidep chi thar dang hmu chhuak bawkin, a hmingah Indian Army chawimawina atan Cyrtodactylus exercitus tiin an vuah ve thung.
Heng nungcha hmuhchhuah thar pahnihte chungchang hi February 18, 2022 khan International Scientific Journal, European Journal of Taxonomy vol.794 chuan a tlangzarh (published) ta a ni.
Prof H.T. Lalremsanga hian zirmi (scientist)-ten harsatna tam tak karah zirchianna belhchiandawl tak, thlai emaw, nungcha emaw chi thar (new species) an hmuhchhuahte hming atan hmun hming, khua, ram emaw mihring hmingchawia phuah hi a pawimawhin, khawvel pum huapa hriat reng tawh tur a nih thu leh nakin zelah thangtharten a hlutzia an la hre dawn chauh tih a sawi.
“Hetianga Mizoram ngei a nungcha chi thar hmuhchhuah a ni zel hian kan ram hi biodiversity-ah a hausakzia a tar lang a, humhalh an ngai hle a ni. Research kaihhnawih nasa tak a min lo pui thintu, Mizoram Forest Department staff leh officer te chungah kan lawm thin hle a ni,” a ti bawk.
Prof H.T. Lalremsanga sawi danin, ramdaidep (Cyrtodactylus/Bent-toed Gecko) te hi gecko dang innghak/bangdaidep/chawlru leh a dangte nen hriat hran dan awlsam tak chu an ketang (toe) te hi phek ve lo a. Ar leh sava ketang ang hian a sin seiin a zum kawm thin. Hmun biru deuh laia zan a chaw zawng a vak chhuak chi ‘Nocturnal’ an nih avangin nungcha hmuh tur tam lo tak an ni a. An khawsak phung leh biology pawh hriat tur a la tlem hle.