India chuan Europe khawchhak lama boruak sang tak a awm zel avangin Ukraine-a a mite awm, zirlaite pawh tiamin, chhuahsan rih turin a ti.
Pathiannia thurawn pahnih a tihchhuaha a hnuhnung zawkah Ukraine-a Indian embassy chuan Indian-te chu Russia-in a thenawm ram hi a rûn mai theih avangin thlawhna pangngai emaw, charter flight emaw pawh hmangin, a remchang ang angin chhuahsan rih turin a ti a. Thurawn a pek chhuah hmasak zawkah zirlaite chu a rang thei anga Ukraine chhuahsan turin a lo ti tawh bawk.
“Inepna boruak sang tak a awm zel avang leh Ukraine borua sang zel avangin Indian-te tan he rama khawsak tul riau chhan tling a awm rih lo va, Indian zirlai zawng zawngte chu Ukraine chhuahsan lailawk tura ngen an ni,” tiin Indian embassy hian Twitter-ah a tar lang.
“Indian zirlaite chu anmahni buaipuitu (student contractor)-te biaa thlawhna awm theite ngaichang turin tih an ni a. Facebook, website leh Twitter-a thupuan tharte pawh ngaichang turin ngen an ni,” tiin India embassy chuan a sawi.
Ukraine-a Indian awmte tan hian Ministry of Foreign Affairs (MEA) chan control room a siam a. Tun kar tir lama thlawhna ticket chang hman lo an awm nual tih report an dawng a. Ukraine-a embassy-ah nileng zankhuaa puitu tur helpline a siam bawk.
Tata-in tun hnai lawka an lei, Air India chuan Ukraine-a zin turin February 22, 24 leh 26 hian thlawhna a tir dawn a. Thlawhnate hi Ukraine-a tumhmun lian ber, Boryspil International Airport-a tum tur a ni.