Inrinna Somalia ram lailia tual chhung thuneitute leh politician eng emaw zat thutkhawmna thingpui dawra thihchilh bomb tihpuahah mi 13 vel an thi.
Beledweyne khuaa thihchilh bomb tihpuaha thi tam ber hi civil mi an ni a, mi dang 20-in hliam an tuar bawk niin police thupuangtu, Dini Roble Ahmed chuan a sawi a. Bomb puak hian ‘chhiatna nasa tak’ a thlen niin a sawi bawk.
A hmutute chuan pawna awm, Hassan Dhiif restaurant-a bomb puak hi a na hle a, thingpui dawr hi thingkung hlima siam mai a ni.
“Ruang eng emaw zat ka hmu a, damdawi ina panpui hliam tuar zat pawh ka chhiar kim thei lo,” tiin hmutu pakhat, Mahad Osman chuan a sawi a. “Thingpui dawra chawlte hian an ei tur chah an nghak mek a, hlim taka an awm laiin bomb hi a puak a ni,” a ti.
Police leh sorkar thuneitute chuan thingpui dawr beihna hi thihchilha tih a ni tih an sawi a, thi zat erawh a sawi lo.
Parliament inthlan tura vote thlak thawh khatna atan an khawpui, Mogadishu hmar lam km 340 vela hla, Beledweyne-ah hian vote thlak hnaih a nih avangin venhimna a khauh lai tak a ni.
Deputy district commissioner pahnih chu thi zingah an tel niin police officer Mohamud Hassan chuan a sawi a. “He khuaa inbeihnaah chuan a la rapthlak ber a ni,” a ti bawk.
Al-Shabab chuan bomb puak hi an tihah an chhal tih SITE intelligence chuan a sawi a, anni hi hel pawl thlithlai rengtu an ni.
Muslim firfiak pawl hi sorkar leh civil mite an bei nasa hle a, chawlhkar hnih liam ta chhungin an che nasa zual a. Al-Qaeda nena inzawmna nei niin sorkar paih thlak an tum.
Beledweyne an beihnaah hian Somalia-a parliament inthlan kal meka chuhtu pakhat pawh a thi tel niin mi chengte chuan an sawi.
Somalia parliament inthlan hi November 1-a tan kha niin December 24 thleng tura ruahman ni mah se tunah hian a la kal zel a, February 25-ah an zo dawn.
Somalia-a an inthlan dan hi a chhawng a, hnam hrang hrang aiawhten rorelna in hniam zawka thu tur an thlak phawt a, heng mite hian president thar tur an thlang leh dawn a, president thlan hun hi an la sawi chiang lo.