Kea Mizoram fan chhuah tuma Mizoram chhim lam pan leh tur, kum 64 mi, Lalbiakthanga chu nimin chawhma dar 10 khan Sikulpuikawn, Aizawl atangin MJA President Zonunsanga Khiangte-in a vailiam.
Sailulak khawchhuak, Lawipu Veng, Aizawla cheng mek, Lalbiakthanga hi February 9 khan Vairengte atangin a zin tan a. Kolasib tlangdung a fan hnuah, Bairabi lam atanga Mamit tlangdung fang lehin Reiek atangin Aizawl a lut a, Mizoram chhim lam fang turin nimin khan a chhuak leh ta a ni.
Lalbiakthanga chuan kea Mizoram fan chhuah a tum chhan – hnam inpumkhatna, thih hnua mi dangte tana mit (eye) pek pawimawhna, tuihna leh nungcha humhalh pawimawhna puanzar te a nih thu a sawi.
Kea Mizoram fan chhuah tum vai liamtu, MJA president chuan Lalbiakthanga’n Mizoram fan chhuah a tum chhan, a thuchah kente chu ropui a tih thu sawiin, a kal zelna turah Pathian hruaina leh awmpuina dawng zel turin duhsakna a hlan a. A tum hlen thei ngei tura hriselna tha nei zel tura duhsakna hlanin, a thuchah kenin rah tha tak chhuah ngei se a duh thu a sawi bawk.