Sipai chakna hmanga then-awm Ukraine a bei chiam chung pawhin kumin May thlaa Turin, Italy-a neih tur Eurovision Song Contest-ah Russia chu tel phalsak a ni dawn tho. Ukraine pawh! Thu mu hnu kaihthawh a ni thei dawn em, hriat ni lo mah se, boruak a \ang at nghal.
A nâ a sin!
Hun kal tawha ram pahnihte inkara inelna fuh zan lo awm tawh te mitthlaa ah a lo lo lang uar uar a, tunah lah ni se, an inrun nasa mai chu a ni bawk si. 2016 khan Ukrainian singer Jamala-i’n last minute tak meuhah champion tura rin tawh Russia beiseina chu vaw thla in, ‘1944’ hla hmangin a dingchhuak ta zawk a, boruak a sa nghal phat.
He hla hi 1944 kuma Josef Stalin-a’n Crimean Tatars ho a hnawhchhuah rum rumna tarlanna niin, an ram parliament meuh pawh-in mihring insuatna rapthlak taka a tarlan kha a ni nghe nghe.
Hla thu hi 2014 kuma Ukraine ram bungkhat, Crimea chu sipai chakna hmanga Russia-in a hneh-chhuh dodalna leh sawiselna anga hriatlar a ni tel bawk a, zaithiam Jamala hi Crimean Tartar a lo ni bawk nen, sawi hat hat kaiin, thu inchuna nasa tak a thleng zui bawk.
“He hla in a tum ber chu story hriatreng a, hraitchian kha a ni deuh mai. Kan hriatchian phawt chuan kan inveng thei a ni,” tiin media mite zawhna a chháng.
Zahthlak bawk si
Eurovision song contest zin-kawngah khan tunhma zawnga Russia lama vote thin Soviet hun laia ram thahnem tak khan Jamala lam an awn deuh duak a, hei taka hi Russia hmai ben sawkna a ni chiang hle. Final result kha Russia tan a mualphothlak hle a, a rilrunatthlak a, pawmzam mai theih a ni lo. A na vawng vawng! Crimea chhuhsak an nih dan leh vau an tawh rengnaah Ukraine an lungawi bik lo. He thil thleng hi Russia chochhuah ah an ngai hmiah. Phuba an la.
A hmu deuh maiah Russian contestant Julia Samoylova chu Ukraine-a luh khapsak a ni zui leh mai bawk a, Ukraine-in Eurovison Song Contest a thlen kuma thil thleng hi Russia tan biang lehlam ben leh sawkna a ni a, insum zo lovin a puak chhuak tep a ni. Ukraine lam chuan Ukraine ram-chhung atanga lut lova, Crimea bial atanga a kal nia puhin, ram dan a kalh, a ti. Report thenkhatah chuan Samoylova hi kum thum chhung Ukraine ram luh an khap.
Boruak a kal fuh lo hle a ngaih a nih vangin Russian television Channel One chuan he contest hi a pe-chhuak dawn lova, a inhnamhnawih lovang, tiin a chhanglet. Ukraine sorkar hian Russia ram kaltlanga an ramchhunga lut te hi dan kalha ramri kan ah a ngai hmiah.
Thil awmdan enzui zel
Organiser te chuan he intihsiakna hi politics tel lo, cultural event a nih angin Russia leh Ukraine te chu an tel ve theihna turah harsatna an siam dawn lo, an ti a. Hetih lai hian, thil awmdan uluk takin an vil zui reng dawn tih erawh an sawi.
Kum 1994 atangin Russia hi Eurovision Song Contest-ah a tel tan a, 2003 khan Ukraine tel ve lehin, ram pahnih te hi politics thilah inhmu thiam lo mah se, he intihsiakna ah hi chuan rilru zau tak an pu dun nia ngaih theih tur a thleng thin na a, lehlamah inbakkaihna leh intaina thleng a awm lehzauh thin a ni.