Budget kha mipui pual ni lovin, finance minister pual a ni : Congress


Mizoram Budget 2022-2023 pharh tak chu mipui budget ni loin Finance Minister Zoramthanga pual budget a nih thu Mizoram Pradesh Congress Committee (MPCC) chuan an sawi.
Inrinnia Aizawl Press Club-ah thuthar thehdarhtute an kawmnaah MPCC thupuangtu, Dr Lallianchhunga chuan kumin budget-ah Finance Minister Zoramthanga chanpualah sum dah hnem bik a ni tih sawiin, “Finance department-ah hian major works-ah ringawt pawh Rs. nuai 96,249 dah a ni a, CSS (Rs nuai 35,000) nen phei chuan Rs nuai 1,31,249.99 lai dah a ni a. Hetih lai hian department eng emaw zat (Planning, LAD, School Edn, H&TE, Agri, Horti, AH & Vety, RD, Transport, Tourism)-ah te chuan a taka hmasawnna hna thawhna tur major works-ah pawisa dahsak an ni lo thung,” a ti.
Dr Lallianchhunga chuan, “Heng department changtu minister-te hian hmasawnna hna thawh an duh a nih chuan chief minister leh finance minister ni kawp, Pu Zoramthanga hi nasa taka an tlawn a ngai leh dawn tihna a ni,” tiin, kumin budget hi mipui pual budget ni loin, finance minister pual budget a nih thu leh Zoramthanga hi financial dictator angah a insiam tihna a nih thu a sawi.
Nikum aiin sorkar hnathawh hlawh dah zat an phak loh leh avangin harsatna a thleng leh dawn tih sawiin MPYCC thupuangtu chuan, “Kum kalta khan kum hmasa lama dah zat Rs. vbch 202 a an dah phak loh avangin hlawh lak chungchangah sorkar hnathawkten harsatna an tawk nasa hle a. Kuminah pawh hian nikuma dah zat an phak loh leh avangin sorkar hnathawkte hlawh lak chungchangah an buai leh hle tura ngaih a ni,” a ti.
Healthcare-a sum indaih lohna awm mek ching fel tura hmalakna a awm lo chu mak an tih sawiin Dr Lallianchhunga chuan, “Healthcare hian finance minister budget speech-ah pawh hmun a chang pha lo hi mak kan ti takzet a. Hei hian MNF sorkarin mipuite hriselna lam an ngaihthahzia a tar lang chiang hleah kan ngai,” a ti a. Pensioner-te hmakhawngaia Congress party auchhuahnain awmzia neiin, tun tum budget-ah hian pensioner-te tan nikum lama Revised Estimate Rs. Nuai 1,35,497.47 aiin Rs. Nuai 37,071.43 laiin a tam zawk avangin pensioner-te an lawmpui thu a sawi.
Budget siam rem ngai, Supplementary demand Rs vbc 6025.44 zet awmin, hei hi kum 2021-2022 budget atanga chhutin zaa 54.04 daih a nih thu a sawi a. “Budget chanve aia tam siamrem ngaia a awm hian budget pawn lama sum hman a tam zia a lantir a, hei hi thil tha lo tak a ni. Hei hian sum leh pai enkawlna kawnga MNF sorkarin kalphung mumal an neih loh zia leh an hlawhchham zia a tarlang chiang hle a, MNF sorkarah chuan Budget pawhin awmzia a nei lo tihna a ni,” Dr Lallianchhunga’n a ti.
Dr Lallianchhunga hian, Congress sorkar khan Mizoram sum leh pai dinhmun siam thain, June 30,2016 hnuah RBI atangin Ways & Means hmanga pawisa puk ngai tawh lo turin a siam tha hman tiin, “MNF sorkar hnuah state leiba hi 58.27% zetin a pung tawh a. Hei hian sum leh pai enkawlna kawnga MNF sorkar hlawhchham zia a tarlang chiang hle,” a ti a. MNF sorkarin kum thum chhung lekin RBI atangin Ways & means hmangin vawi 101 sum a puk hman hial niin a sawi.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427