COVID hi a ngeiawm ngawt asin

  • Mahmuaka Chhakchhuak

Mi chutih zahin an vei tawh a, chutih zahin an boral phah tawh bawk tih lam chu kan bengkhawn pawh a nih tawh tak vak loh avangin sawi ta rih lo mai ila. CoviD vanga kan khawtlang nunphung lo danglam tak dante leh kan nitin khawsakna zawng zawnga kan lo danglam tak dante hi sawi tur tam tak a awmin, CoviD hripui leng hian tawp ni a nei te alo nih ngai pawhin kan khawsak phung erawh kan thlak danglam leh thei kher ang emaw tih tur hi a ni ta hial mai a, chuvang chuan kan khawtlang nun danglam tawh ta hi a hmasa (hripui len hma) angah min hruai leh thei ang em tih lam te hi sawi tur tam tak a awm thei awm e.

KOHHRANAH;
Hripui leng vangin Kohhran Inkhawm a theih loh a, rei tak chhung inkhawm loin kan awm a nih kha. Reilote thlahdul hlek a han ni thinin kan han inkhawm a, chutah pawh zai ala rem lo lehzel bawk a. Inkhawm chuan zai ngei ngei tura ngai a, thisena lo bet tlat tawhte tan phei chuan zailoa inkhawm chu a danglam satliah a ni lo a harsa tak a ni. Khuang loa chai ang an tih ang tak tak hi a niin inkhawm chak ngawih ngawihte tan pawh beisei a phak meuh lo a, thusawitu thusawi ngaihthlak ringawt chu kan khawpkham zo lo a ni.
Chutiang chuan rei ang reng tak chhung chu kan han kalin inkhawm hunah pawh thawm a reh thuap a, khuang ri a awm lo a, zai ri a awm loh chuan inkhawm dan alo danglam ngei mai. Thenkhatte tan chuan lam loa awm a har dawn tehlul nen lamna hun awm miah lo a han inkhawm phei chu hrehawm tak tur hi a ni. Khuang rik apianga lam thei mai zel mite pawh hi kohhran tinah hian pakhat tal hi an awm emaw tih tur a niin anni tan phei hi chuan he CoviD hi ngeiawm leh hrehawm phah tak tur a ni. Pathian hnenah ngei pawh vawi tam a kianna turin kan tawngtai tawh nain hei kum hnih pumhlum chu min tibuai ta mai chu a ni si a, engtikah tak min kiansan ang maw?
Kristiante tana hunpui leh hun pawimawh tak takte ngei pawh khuang telloa hman alo ngaih phahin Tumkau niah ngei pawh kan naupangte tan tumkau keng chunga kawngzawh alo rem ta lo a, dik takin sawi ila kum 2020 ah phei kha chuan hrehawm kan ti ngawt a sin. Krismas-ah ngei pawh Inkhawm chu sawi loh, Masi thingfawm a rem lo a, krismas bawng kaih a rem lo lehzel a, kohhran ho lenkhawm te thlengin alo remlo zel chu thinurthlak tak a ni. Kum dangahte chuan mahni kha hmun ngeia chhungkima Masi hman tumin hmun hla tak tak atangin kan haw thin a ni ngai a, tunah chuan CoviD hripui lengin kan nunphung engkim min tibuai tain kohhran leh sorkar lam chang an buai lo a, chhungkaw tin pawh kan buai a nih hi. Masi kawr mawi neih pawhin awmzia a awm lo a, zaikhawmna In lahin awmzia a nei hek lo.

KHAWTLANGAH;
Khawtlangah chhiat/ that a awmin SOP zawm chunga hun hman a ngai a, lawmna lam a ni emaw chhiatna lam pawh nisela midang mitmei veng tak chunga thiltih alo ngai ta zel maite hi a chhan kan hre vek nain lung a awih chiah thei chuang lo a. Thatna lam chu thu hran pawh lo nisela chhiatna lama dan pangngai anga kan han intawiawm thei lo hi chu a thinurthlak duh ngawt mai. A thente chu mahni In pawh luhpui alo remchang loin thlanmualah PPE suit ha chunga invui alo ngaite hi chu vanduaina hi a thuah hnih bik a, he hripui hi a ngeiawm zual bik a sin. Zan lama mitthi tlaivarpui a nih pawhin zai alo la remchang lo zel bawk a, mi tlawmngaite rawn kal ve bawk mahsela ngawi rengin an thu a, tlawmngaihnaah pawh tlawmngai lehchhawng kan ti lo thei lo ang.
Damdawiin lamah pawh damlo kan alo remchang lo zel bawk a, inbiak pawhna lamah erawh tunhma aiin alo awlsamin alo changtlung hlauh zawk a, kan hman uar phah lo thei lo a, thil tam takah kan hmang lo thei ta lo a ni. Chuti nilo phei sela chuan vanduaina tawkte tan hian a hrehawm lehzual ngawt ngei ang. Ral hla atanga Phone hmanga inhnem emaw intawng thlamuanna lam chi te pawh hi he hri leng avang hian alo ngai lehzual tak nain hmel inhmuh loh hi chuan alo famkim tak tak thei bawk si lo a, tu tan pawh hian chhel a ngai lehzual lo thei lo a ni. Lu sun tak rau raua ruang chunga tap hawm hawm thei si loa inthlah liam hi kan awm ta nual mai a, tun dinhmunah rih hi chuan kan la awm zel hmel emaw te a ni bawk si a, sorkar emaw khawtlang hruaitute emaw dem ngawt theih an ni bik si lo a, a thinurthlak ngawt mai.

MIMALAH:
Khawilai hmunah emaw kan thian ngainat tak nen han inhmu mah ila tunhma lamahte kha chuan tukhum che lawih khawpin kan inchibai thin a ni ngai a, tunah erawh chuan a ngampa deuhin kiu leh kiu emaw kan han indeh tir a, a thenin kuttum an han insik tir thul. Hetianga inchibai hi kutphah insi thlapa invuan thin tan hi chuan a lem lutuk a, kut leh kut insuih ngei chu a tluk thei lo a, a tluk hlawl lo a ni. Hnam changkang te chuan ‘Hi’ emaw an han ti ringawtte hi lo duhtawk mahsela keini mizopa tan chuan hneh taka kut invawn a, tukhum che lawih khawpa inchibai loh hi chu inchibaiah kan ngai thei tak tak lo a. Chu mai ala ni lo, chaweia insawm ngei hi induhsaknaah kan ngai thin a ni a, nimahsela chung zawng zawngte chu CoviD hri leng vangin mitin kan inhlau tawn ta vek mai si a, kan duh emaw duh lo emaw midang hlata awm hram hram alo ngai ta zawkin chawmal thlauh ho lam chu a rem thin si lo a, he hrileng hi a ngeiawm a sin.
Zirlaite tan ngei pawh Cell Phone hmanga Online-a lehkha zir alo ngai ta te hi hri leng vang vek a ni si a, chuti chunga thahnem an ngaih loh phei chuan buaithlak duh tak a ni. Sawi tur a tam mai, he hrileng hi chuan kan nunphung min la tibuai chho zel dawn emaw a nih hmel a, hri leng nena lendun hi kan zir chhoh zel pawh ala ngaih hmel a ni. Chutah a zir thiam deuhin pangngai deuha an hman mai theih laiin a zir thiam lo deuh te chuan kan la buai phah lehzual emaw te a nih ngei hmel bawk ang. He CoviD hri leng zet hi chuan min va han tibuai zo zai tak em aw!

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427