Ukrainian sipaite chuan an khawpui pahnihna, Kharkiv-a Russian sipai lutte chu nasa takin an bei let mek zel tih tual chhung thuneituten an sawi.
Helai bial governor, Oleh Sinegubov chuan lirthei lian lem lo (light vehicle) hmangin beitute hian khawpui an luhchilh tih a sawi a, mihring maktaduai 1.4 zet chengte chu pawn chhuak lo turin a ti.
Inrinni zan zankhuaa khawpui hi missile hmanga kah a nih hnuah Russian sipaite hian an luhchilh a ni.
Emergency services chuan mihring chenna in chhawng kuaa sang chu missile hian a fuh tih an sawi.
In hi a chhe nasa hle a, pitar a thi a. Chhanchhuah hna thawktute chuan mi 60 vel hliam tuar an la chhuak a, lei hnuaia him theihna hmun turah an dah tih an sawi.
Russian sipaite hian a bul lawka gas pipeline an tichhe bawk niin Ukrainian state communications agency chuan a sawi bawk.
Khawpui?ber, Kyiv bula tuialhthei chhekna pawh missile-a kah a lo ni tawh a, boruak a tihchhiat phah hle rin a ni.
Kyiv chhim lam km 30 vela hla, Vasylkiv an kah hian a kang nasa hle a, zan thimah vansangah thui tak a alh chho a ni.
A bul hnaia awmte chu an tukverh khar tura tih an ni a, Kyiv khawpui bika chengte chu lei hnuai lamah a tam zawk an lut tawh.
Khawpui berah hian curfew khauh tak puan niin Thawhtanni thleng a awh dawn.
Pathianni khan Kyiv khawpui hi a reh hle a, police, sipai leh raldo tura inpete bak khawlaiah hmuh tur an awm lo.
Russia-in a rûn atanga ni linaah pawh Kyiv-a in chhawng sangahte chuan an ram flag a la inzar hlawm.
Lei hnuaia lirthei hunna, metro station leh basement-ah te mi sang chuang himna zawngin zan thim hnuaiah an khawsa mek.
Hetih lai hian hmar lama Okhtyrka khawpuiah governor chuan hmeichhe naupang kum sarih mi telin Ukrainian paruk chu Zirtawpni khan Russia-in an beihnaah an thi niin a sawi.
Russia hian kindergarten leh hnuchham enkawlna inte pawh an kap chhia nia sawi a ni a, anmahni erawh chuan an pha thung.
Ukraine Foreign Minister Dmytro Kuleba indona thubuai (war crime) siam an tum thu leh International Criminal Court-in an chet dan chu chhui se a duh thu a sawi.
Ukraine-ah hian civil mi 240 vel indona tuar tawh awmin an zinga 64 chu an thi niin Office of the United Nations High Commissioner for Human Rights (OCHCR) chuan a sawi.
In leh hmun pawimawh tak tak chhia avangin mi za telin tui leh electric an nei lo bawk tih a sawi.
Ukrainian sang tam tak chuan indona tlanchhiatsan tumin an thenawm ram an pan a. Poland pantu ringawt pawh mi 1,15,000 chuang an ni tawh a. Mi thenkhat chu ni hnih chuang inkhalhin an thenawm ram an thleng a, ramri checkpoint-ah km 15 chuanga thui an intlar bawk.
Tlanchhiate hi a tam ber chu hmeichhia leh naupang an ni a, mipa kum 18 leh 60 inkarte chu raldo tura la awm tura ngen an ni.
Indonaah hian Russia chuan nasa takin bei mah se Ukraine hi a la tang ve zel.
United States-a indona lam viltu pakhat chuan ‘lei leh vansang atangin nasa takin bei mah se Kyiv an hual leh thunun an tum chu a hlawhchham rih’ tiin a sawi.
Study of War hian Russian-ten hmarchhak leh khawchhak lama khawpui dang an beihnaah pawh ‘beih dan inruahman that loh vangin’ an tum angin an che lo niin a sawi a. Ukrainian sipaiten ‘an beisei leh rinlawk aia nasain’ an lo bei let nasa bawk niin a tar lang.
Thlithlaitute hian Ukraine chhim lama Russia an hlawhtlin chu hma an sawn zelna tur atana pawimawh ber a nih thu a sawi bawk.
A thenawm ram rûn tuma a inbuatsaih lai atang tawha an lo vau tawh angin ram tam takin Russia hi an hrek thu an puang mek zel.
EU, US leh an thawhpui ram dang dangte chuan indona a kalpui mekah sum a hman theih lohna turin Inrinni khan Kremlin hrekna na tak an kalpui tan tih an sawi.
Hrekna thar hi US, UK, Europe leh Canada ram pawhin pawmpuiin Russian bank-ten Swift an hman ve theih lohna turin an ti a. Swift hi pawisa inpekna hmanrua niin liantham tak taka inthawn kualna a ni.
Russia pawh hi a ram ei bar innghahna ber pakhat, tuialhthei leh boruakalhthei a thawn chhuahnaah Swift-ah hian a innghat nasa hle a. A hmang thei rih lo tur hi a tawrh ve hle rin a ni.
Russia-in central bank-a thil a neihte pawh khawih chet theih lohvin dah a ni bawk a, hei hian ram pawn lama a thil leh sum neihte hman kawngah a tibuai hle dawn a. He hrekna hian anmahni ram pawisa kaltir vel chu nasa takin a nghawng dawn a ni.
Russia-in a thenawm ram a rûn avanga hrem nan hian Germany chuan Inrinni khan an ram chung zawn chu Russian thlawhnate thlawh a phal lo ve tan bawk a, a hmain Baltic ramte chuan he phal lohna hi an lo kalpui tawh hlawm.
An ram chung zawna an thlawhna thlawh a phal loh chhan let nan Russia hian an ram chung chu Latvia, Lithuania, Estonia leh Slovenia ram thlawhna thlawh phal loh a nih thu Pathianni khan a puang ve nghal a. A hmain Bulgaria, Poland leh Czech Republic thlawhna te a lo khap tawh bawk.