Manchester United season fuh lo chu a la kiam thei tak tak lova, Inrinni zanah goal hmaah an hriam tawk loh avangin tlak hlauhawm a awm mek Watford lakah 0-0 in draw result an nei.
Old Trafford-ah Red Devils hian inkhel an thunun a, chance \ha vawi engemaw zat nei chungin goal hmaah an che fuh thei lova. Khelmual an chhuahsan dawnin an fans ten an ‘boo’ khum nasa.
Season thar a UEFA Champions League khelhphak ngei tum a bei United hian Roy Hodgson-a pawlte lakah hian goal shot vawi 22 an nei a. Mahse goal-ah vawikhat chiah niin Cristiano Ronaldo offside avangin pawm a ni lo.
Ronaldo hian goal ban a pet per bakah goal a lut ngei tura ngaih Anthony Elanga a pet per bawk a. Swedish rawlthar hian tunhnaia an inkhel hnuhnung pahnihah a team chhanhim mahse tun \umah a thei lova, team goal mawi ni tur a hmawr a bawk thei lo.
Ronaldo hnampui Portuguese playmaker Bruno Fernandes pawhin first half-ah chance \ha tak vawi hnih a hloh bawk.
Lehlama goal hlauhawm awmchhun chu Emmanuel Dennis-a chungah a tla a, mahse David de Gea a tibuai thei tak tak lo.
United point hloh
Watford in hnehna chang se result mak tak a tling dawn a, tikhawp chuan United in inkhel an thunun.
Ralf Rangnick hnuaia inkhel an thunun bakah chance an insiam hnem ber \um zinga tel ngei turin United an hlauhawm a. Mahse vawikhatmah goal-ah an chantir thei lo.
Ronaldo-a’n minute thumnaah goal ban a pet per a, Fernandes-a’n goalkeeper chauh hmachhawn tawhin \um hnih a khung lo bawk.
A rei telh telh a, United player-te an \ang ulh a. Watford in point hlu an hmuh laiin United tan point hnih hloh a ni a. An hnuaia awmte aia an khelh tam avangin an tan Champions League football a beiseiawm loh telh telh.
United interim manager Rangnick chuan, “Goal khung tih loh chu engkim kan ti dik vek.”
“Result pawm harsa tak a ni a, goal hmaah kan hriam zawk a \ul. Vawiina chance kan insiam ang zat aia tam kha inkhel vawikhatah siam a harsa zawk ang, kha khan thin a ti ur zual.” a ti a.
“Vanduai vanga khung lohte awm mahse one-on-one khung loh pawh kan ngah a. Kha kha vanduai ni lovin goal hma a hriam loh vang a ni.” tiin a sawi ve bawk.