Auto Corner
by Ruata
2022 Maruti Suzuki
Wagon R tlangzarh
Maruti Suzuki chuan an lirthei lar leh lai hlawh em em Wagon R chu kum 2022 model an tlangzarh veleh ta a. Han en mai chuan danglamna lutuk a awm lo a, hetihrual hian thil hrang hrang a rawn neih thar bakah thlak te a awm a ni.
Maruti Suzuki Wagon R hi kum 1999 khan India ram market-ah tlangzarh a lo ni tawh a. Tluang takin tun thlengin a lirthei chi thar hrang hrang awm chhoin a la chhuak char char a ni. Tuna chhuak mek 3rd generation model lian tha tak hi kum 2019 khan tihchhuah a ni a. Tuna kum 2022 model pawh hi tuna third generation chhunga mi tho hi a ni ang..
2022 Maruti Suzuki Wagon R-ah eng nge kan hmuh dawn
Maruti Suzuki chuan kum 2022 model Wagon R-ah hian rawng chi hnih inpawlh dual tone rawng an rawn dah thar a. Hei hi chi hnih – Gallant Red with Black roof leh Magma Grey with Black roof te a ni dawn a ni. Hetihrual hian a dual tone rawng bik erawh hi chu a man to ber ZXI+ variant hoah an rawn dah thung a. Rawng chi khat nei ho aiin Rs. 12,000 velin a to belh ve dawn a ni. Model update thar Wagon R-ah hian thil thar blacked-out alloy wheels kan hmu dawn bawk a. A hma kha chuan a man to hoah pawh steel rim, a chunga wheel cover-a khuh chauh a awm.
A chhunglamah chuan a chhung rawng hrim hrim hi Maruti chuan “beige and dark grey melange” rawngah an thlak a ni. Heng bakah hi chuan a pawn leh a lirthei chhung lamah chuan a chhuak mek nena khaikhina a danglamna vak a
tam tawh lo a. India ram sorkarin chetsual palha himna tur hmanrua ‘airbag’ pahnih tal a ni tawh tur a ni an tih chu an rawn zawm ve a ni.
A khawl leh thildang
April thla atanga lekkawh tur, CAFE 2 norms, lirtheiin Carbon Dioxide a pek chhuah zat tih tlem belh lehna tura dan thar siam chu zawm turin a khawlah hian a lenzawng inang tho mahse a chi thar deuh, boruak bawlhhlawh pechhuak tlem zawk tur a rawn hmang dawn a. A hmaa khawl chi hnih a neih ang tho- 1.0 litre leh 1.2 litre khawl te a nei leh dawn a.
Heng khawl te hian Dual Jet, Dual VVT (variable valve timing), cooled EGR (exhaust gas recirculation) leh ISS (idle start-stop) technology te a rawn nei tawh a, hei hi lirtheiin petrol a heh lohna tur a nih bakah boruak chhia pekchhuah kawngah sorkar dan a zawm that lehzual theihna tur a ni.
1.0 litre khawl zawk hi tuna Celerio chhuak thar pawhin a hman mek ang hi a ni a. Petrol khawl niin he khawl hian 67hp power a pechhuak thei a, a hma aiin 1hp in a power a hniam zawk a ni. Dual fuel variant an tih petrol leh CNG duhthlan theih model chuan petrol khawlah 65hp power
leh CNG mode-ah 57hp te a pechhuak thei a. CNG hmang hi a hma khan a man tlawm ber chiahah duthlan turin a awm a, tunah chuan a laihawl ho VXI variant ho velah pawh a awm tawh dawn e.
1.2-litre khawl thung hi chu Swift leh Dzire, Baleno thar tih velin a hman ang hi a ni a. A power output pawh 90hp lai a ni tawh a, a hma aiin 7hp in a sang tawh dawn a. A chak tha lehzual dawn ang.
A petrol heh zawng chungchangah hi chuan Maruti hian tan an la khawp mai a. 1.0 litre khawl zawk hian petrol litre khat hmangin km 25.19 lai mai a tlan thei dawn a. 1.2 litre khawl hian km 24.43a tlan thei tura chhut a ni bawk a ni. Heng lirthei petrol heh zawng an chhut dan hi a lirthei variant hrang hrangah a dang ve a.
Hetihrual hian keini tlangram angah chuan a inang diak diak thei lo ang a, chutihrualin lirthei lian lo hoah chuan a changkang pawl leh a chak tha pawl ni tho si, petrol heh lo pawl tak a ni tih erawh a chiang awm e. Transmission lamah chuan danglamna lutuk a awm lo a. 5-speed manual leh 5-speed automatic hi duhthlan tur a la ni reng a ni.