Aizawl: Zoram Industrial Development Corporation Limited (ZIDCO) kaltlanga buhfai supply zingah Silchar police-in Myanmar atanga kuhva rah tawlh chungchanga an rinhlelh lian tak, Abub Ahmed Majumdar a tel.
Session neih meka Food, Civil Supplies & Consumer Affairs department Minister K Lalrinliana’n ziaka Thorang bialtu MLA Zodintluanga Ralte zawhna a chhan danin, Commerce & Industries department atanga thu an dawn danin, MNF sorkar hnuaiah ZIDCO kaltlanga buhfai supply-tu mi pariat an awm a, hming tar lan zingah Abub Ahmed Majumdar a tel a, M/S Agri Fresh Trading Co., Silchar tia tar lan a ni.
Nikum July 26-a Mizoram leh Assam state pahnih ramri inchuhna avanga inkahna a thlen hnuah, a vawi khat nana November 25, 2021 zana Assam Chief Minister Himanta Biswa Sarma leh Mizoram Chief Minister Zoramthanga te New Delhi-ah an inhmuha zanriah an kilnaah Silchar police-in Myanmar atanga kuhva rah tawlh chungchanga an rinhlelh lian tak, Abub Majumdar chu Zoramthanga tawiawmtu zingah a tel niin Barak Bulletin chanchinbuin a lo tar lang tawh.
Hemi chungchangah Mizoram Chief Minister’s Office (CMO) insawifiahin, he zanriah hi Assam chief minister buatsaih a nih zawk thu te, Assam CM sawmna angin New Delhi Assam House-ah zanriah hi Mizoram CM hian a va kilpui thu te, hemi tum hian Zoramthanga hi Delhi Mizoram House Resident Commissioner te, Officer on Special Duty to CM leh Addl. PS to CM ten an tawiawm a. Anni bak hi hemi tum hian amah tawiawmtu an awm lo niin a tar lang bawk.
“Mizoram chief minister sawmna anga Abu Mazumdar-a’n a tawiawm tih hi thu belhchiandawl lo a ni a; ani hi Assam chief minister lamin an sawmna anga he dinner-ah hian lo tel ve a nih a rinawm,” tiin CMO thuchhuahah tar lan a ni.
MNF General Headquarters pawhin thuchhuah an siam a. Chief minister tawiawmtu zingah Assam police-ten kuhva tawlhru thin anga an rinhlelh mek, Abu Majumdar-a a tel anga thu thehdarh a ni chu thudik tawk lo a nih thu an sawi a. Assam chief minister hian amah tawiawm turin Minister Atul Vora leh Abu Majumdar te hi a sawm zawk an nih thu sawiin, “Abu Majumdar-a hian Assam CM hi New Delhi a thlen khalh a, Mizoram House-ah Pu Zoramthanga leh a tawiawmtute hi va hmu hmasain, anni hian Assam House-a thleng turin an lo kawhhmuh nghe nghe a, Assam House-ah hian Minister Atul Bora nen an thleng dun ta nghe nghe a ni,” an ti.
Zanriah kilhonaah pawh Abu Majumdar-a hi a tir lamah a lut ve mai nghal lo nghe nghe a, Assam CM hnenah, ‘I sawm a ni lo’m ni, pawnah a awm,’ an tih takah chauh Assam CM hian a koh luhtir tih hriat a nih thu, MNF thuchhuahah hian tar lan a ni bawk.
February 9, 2021-a Mizoram BJP thuchhuahah, Assam Chief Minister Office an biak pawp thu leh, Mr Jyanta Malla Barua, MLA, Secretary to CM chu February 9, 2022 khan an biak thu an tar lang a. “Abu Majumdar hi Delhi inbiakna leh dinner neih honaah Assam CM Party zinga mi leh Assam CM team hruai ni loin, Mizoram CM party zinga mi a ni, photo-ah pawh a chian thu BJP Mizoram hruaitute an rawn hrilh a ni. Tin, Mr Abu Majumdar hi kuhva ro Mizoram atanga Assam rama smuggling luh thua Assam sorkarin man tura a zawn mek a nih thu BJP Mizoram hruaitute an rawn hrilh bawk,” an ti.
Hetih lai hian, February 10, 2022-a Siaha Bazar-a Mara District Congress Committee (MDCC) huaihawta vantlang inkhawm neih a hmanpuinaa Zodintluanga Ralte, MLA hian thu sawiin, “Thil chiang tak mai chu, he Abu Majumdar hi Congress sorkar laia lo lang ngai lo, MNF sorkar vela buhfai rawn supply-tu lian ber mai hi a ni,” tiin Abu Majumdar chuan Mizoramah tun ministry atangin hian buhfai ‘supply’ hna nasa taka a thawh thu pho lan mek a nih thu a lo sawi tawh bawk.
ZIDCO kaltlanga buhfai supply-tute:
- Mrs. Runremsangi
M/S Carbon Multipurpose Society
Chaltlang, Aizawl - Mr Abub Ahmed Majumdar
M/S Agri Fresh Trading Co.
Silchar - Mr Johny Lalduhsaka
Luangmual, Aizawl - Mr Lalzawmmawia
Venglai, Kolasib - Mr F Aithanga
Chaltlang, Aizawl - C lalrampari
M/S CR Enterprise Mission - Mrs Hmingdailovi
M/S HD Enterprise
Mission Vengthlang, Aizawl - Mr Lalthuama
Venglai, Kolasib