COVID-19 hripui leng mekah India chuan a thawh lina chu June 22 vel atangin a tuar leh tan dawn a, August thla laihawl leh thla tawp inkarah a vanglai a thleng leh dawn niin Indian Institute of Technology-Kanpur-a mi thiamten an zirbingnaah an tar lang.
Peer-reviewed study tia an sawi, reseacher-ten hri leng kal zel dan tur an thlirlawkna hi MedRxiv-ah tar lan niin thawh lina hian thla li vel a awh dawn niin an sawi bawk.
IIT Kanpur-a Department of Mathematics & Statistics-a hotu lian – Sabara Parshad Rajeshbhai, Subhra Sankar Dhar leh Shalabh ten an duanah hian thawh lina hi coronavirus chi (variant) thar chhuah leh chhuah loh leh invenna lak dinhmunin a nat leh nat loh a hril thui hle dawn tih an tar lang bawk.
Zirchiannaa an thil hmuh ziaktute chuan, “Data atanga a lan dan chuan thawh lina hi data awm sa, January 30, 2020 atanga ni 936-ah a lo thleng dawn a ni,” tiin an ziak.
“Chuti a nih chuan thawh lina hi June 22, 2022-ah intanin August 23, 2022-ah a vanglai a thleng ang a, October 24, 2022-ah a tawp ang,” an ti bawk.
Zirchiangtute hian variant thar a chhuak a nih chuan an zir chhuah pum pui chu nasa takin a danglam dawrh thei niin an tar lang bawk.
Hri leng thawh lina nghawng hi thil hrang hrang – variant thar insiam, thihna thleng leh a dang dangten a nat leh nat loh a hril dawn niin an tar lang.
“Heng bakah hian invenna lak dan dinhmun a pawimawh a. Dose khatna, hnihna leh booster dose lak zatte chuan kai an tam leh tam lohvah nghawng thui tak a nei dawn,” an ti.
World Health Organization pawhin Omicron chu Covid variant zinga a hnuhnung ber tur a nih loh thu leh a dawt leha lo chhuak tur chu a thawk na zawk dawn niin an sawi.
WHO hnuaia Covid-19 chungchanga technical lama an hotu, Maria van Kerkhova chuan, “Variant lo chhuak leh tur hi a hmaa mite aiin a fit zawk dawn a, chumi awmzia chu tuna a darh dan mek kan hriat hi luahlan vekin kai a awlsam lehzual ang,” tiin a sawi.
Tun tuma thawh lina sawi lawktute tho hian thawh thumna pawh kha tun ang hian an lo thlirlawk tawh a. February 3, 2022 khan thawh thumna vanglai thleng tur angin an sawi lawk a, sawi dik lo hret mah se a dik thawkhat viau a ni.