Mizoram Assembly Speaker Lalrinliana Sailo laka Lokayukta-a complaint an thehluh chungchangah nimin khan ZPM party hruaituten Larsap Dr. Hari Babu Kambhampati hmuin complaint an thehluh chhante an hrilhfiah.
Raj Bhawan-ah hian ZPM hruaitu – Working President K Sapdanga hovin Vice President Dr. Kenneth Chawngliana leh Rev. Dr. K Thanzauva te bakah PAC member TBC Lalvenchhunga te an kal a. ZPM party-in PMGSY hnuaia Khawzawl – Ngaizawl kawng siam chungchanga Assembly Speaker Lalrinliana’n dan kalha mi hming hawha contract hna a lo thawk anga lang leh hemi denchhena Rs. nuai 100 a lo ei anga thuthang chungchang chhui chiang turin February 23, 2022 khan Lok Ayukta-ah complaint an thehlut tih larsap chu an hrilh a ni.
ZPM party hruaitute chuan CYMA-in MPWD nena inremna an ziak bawhzuia kawng siam hna an endikna report-ah hnathawktu (contractor) hmingah Lalrinliana Sailo hming chu hmun hnihah a lang tawh tih larsap chu an hrilh a. RP Act 1951 Section 9A-in a sawi angin Lalrinliana Sailo chu MLA atanga disqualified theih a nih thu leh Lokayukta thuam chaka complaint chu chak zawka chhui tura hmalakpui turin larsap chu an ngen bawk.
Mizoram sorkar hnuaia dan leh thupekin awmzia a neih lohziate, dan phal loh thil smuggling hluar lutuk chungchang leh ramri buaina bakah chief minister-in budget pharh zawha press meet a neih tuma contractor ni lo contract hnathawh leh restricted tender hmanga duhsak zawng hna inpek chu kalphung pangngai ang maia kalpui a nih thu a sawite pawh ZPM hruaitute chuan Mizoram larsap chu an sawipui bawk a ni.