- Chhantea Pautu
Sabre hi, hmanlai chem sei, kan Bible \awngkam takin khandaih chikhat, sakawr chungchuang sipai ten an hman \hin a ni. Indona hmunah a mikhual lo hle a, indona hrang hrangah sipai ten an vilikin invai vung nan tak an lo hmang tawh a, indona pawh a lo pal tlang hnem tawh fê awm e. Ottoman war an tih te, American revolution leh American civil war-ah te leh indopui pakhatna leh pahnihna thleng pawha leklam taka an lo hman tawh bakah, hmanlaia mi pahnih inkar buaina, inhriat thiam lohna an chin fel dan, ‘duel’ an tih maiah pawh an lo hmang \hin. Mi chhun na thei leh mi hliama mi ti pem thei hmanraw hlauhawm tak chu a lo ni tawh ngat mai.
Mizoram Assembly House chhunga in bye bye video a rawn lar hat a. Kha session lo en khan thin hi a lo rim ngawih ngawih a, patlingpui pui kha naupangchhe chêtin an chein an khawsa a, awmze nei lovin awm hmunah kan lo insawh kan lo insawh ringawt mai zawng a ni e.
Ram hmangaiha Politic tuipui inti, ram \hatna tur hawlh pha chiah si lo, thu puarpawleng mai mai sawia thu veivira chil per thlawn phuh chhuaktu \henkhat hi chuan, mahni sahmin tih puar nan thu hmasial an chhak chhuak satliah ve mai a ni. Party mal \an bur, a dik a dawk thlu lova mi thil tih dik lo lai ni âwm tak dap hmu thei fû fû, an thil tih fuh lai hmu fuh duh leh hlek si lo, ram hmangaih hauh si lova mahni pumpui leh mahni awmna party chauh hmangaih party worker tam takte hi ram tana hnawksak tham an ni bawk.
Mahni hlawkna tur ni lova ram hmangaih peih der si lo, mahni pute thil dik lo ti tura nawr chîng leh an thil tih dik loh sawi mawisak \alh chîng ten a lukhawng beisei avang chauha pute an campaign pui pawh ram hmangaih vang a ni hlek lo ve. Ram develope nana contract awm thei therhlo tete pawh an chan vek tur emaw ti tlat a, mi dang kian duh hauh lo rulling party worker angte hi lawm langsar lo lama hnawksak em em.
Khua a var lo! Kan ram zîmte politic han thlir hian, khua hi a var thlâwt lo. Amaha \hat lohna nei hauh lo politic chu hmanraw hlauhawm berah kan hmang chho mek a, kan political system a dik loh avangin politic chu mi dik leh \ha ten thil sual ang maiin an hmu zo ta bawk. System a fuh loh miau avangin, ram hruaitu nihna chu kan politician ten mahni sum tur tuak nan kan hmang chho ta mek. Hei hi, mipui hian kan hre reng a, he salah hian kan tâng laklawh mai a ni zawk. Hahthlak hian!
Mahse, political system dik lo chuan kan sûkthlek leh rilru puthmang a hruai sual a, kan moral hi a ei chhe zo tawh a, politic chu mi chhunna khaihdaih a chang zo a, ram a hliam a, mipui thinlung a chhun a, a viliktu politician lam an inchhek arbawm a, inhai vurin tangka phenah an mize tenawm an thukru a, dik hi a dik lo zo tawh a, dik lo lah chu dik ang maia kalpuiin kan ram inkaihhruaina tur dan siamna hmun Assembly House pawh naupang inawmlemna hmun ang maiah kan chhuah ta.
Kan nau pakhat leh a \hianpa chu, an naupan lai chuan inkawm ngeih em em, awm dun chawt an ni. An inhau ve fo va. Vawikhat chu, an naupan laiin an inhau a, a \hianpa zawk chu a titau a, “Ka haw daih dawn,” a han ti a. A ni kan nau lah naupanga thuchâng, “Haw rawh…haw char char rawh,” a lo ti mai si. Kan Assembly House boruak tenawmzia leh nawizia ka hmuh hian, naupang inhau leh inkhualtelem hi ka hre chhuak tlat zel.
Kan political system hi kan thlak hma loh chuan ram, mipuite leh ram hruaitute tan thang hlauhawm a ni reng dawn. Contract kan kalpui dan, kan thawh dan, hna kan hmuh dan leh hna chhuak kan chhan dan system thleng hian a khawlo zo tawh a, contractor mi tu emaw hming hawha hna thawhte pawh dik lo ti phal lo khawpa kan ram hruaitu lu berte an \awng tawh chinah chuan dik hi a dik lo ta zawk emaw tih a awl dawn ta riau mai. An tiam, manifesto leh development an kalpui dan system te hi kan lo chîk emaw, inthlan dawn hnaih hi hma lak tak tak hunah zuk hmang deuh zel hlawm chuan.
Zirlai pawl leh tlawmngai pawl kan neih dangte lah chu, politic khelhna kailawnah kan hmang deuh zel emaw tih mai turin, CYMA, MSU, MZP tihte hi hemi kawngah hian 100% chuan an fihlim hauh lo. Tu emaw hmanrua(puppet) mai mai hi an ang fo bawk zu nia! Hei hi an member tam zawk hian an man miah lo va, an man loh vang tak hian an hruaitute thlavang hauh tawk an lo awm leh \hin. Ram leh hnam tana \angkaina chin chu an nei nameuh mai; mahse, sum hi a ni. Sum hian mit a ti del tlat.
Nunna chhah nan, kan ram hnuk chhah nan, mipui thinlung chhun tlang nan, mipui awhna lênah politic hi politician ten an hmang mek. Mipui lah kan dik hek lo, dik lo hi dik lo ti phal lo turin kan thluak an hîp khawro zo ta e. Harh a hun. Mi dik lo leh pamhamte hnawl a hun. He Sabre System hi paih a hun.
Lu chhum bân chhum huamin lâ leh vâl te;
“Dam leh tlâng khatah, thih leh ruam khatah”
Awww nangni Police…
In thinlung thu vawn hei hi a nih a,
Damna tura \an rual in thiam hun leh,
In ram chhan rilru put in thiam hun chuan,
Zirlai chunga kut lek tâwk in thiam tawh ang a,
In ram in hnam tân zâi in lo dawh thiam tawh ang!
Awww nang Politician…
An thlan chhan che rilru dik i put a,
I hnam hmangâia rorel i nih leh,
Thlangtu che mipui hmai i zah hun chuan,
Ram leilung fa tân hnam dang i hnáwl tawh ang a,
I mipuite duhsak dàn i zir chhuak tawh ang!
Awww nang Zirlai…
Zirna \ana i ram i ngaihtuah a,
I hnam tân hmathlir \ha i neih hun leh,
\ap chunga i hnam tân i awm hun chuan,
I ram i hnam tân i thawhna ka zah ang a,
Hliamin thisen chhuak mah se, ka chhuang tawh ang che.
Awww nangni Mipuite u…
Hnam hmelma roreltu an awm hun a,
Ram hmelma Politician i hmuh leh,
Dàwt ânkâ sawi hmang Hruaitu i hmuh chuan,
“Hnawl rawh aw, ” tiin ka ngen ngawih ngawih che ang a,
Thinlung dik nen vote thlâk turin ka duh ang che!
Hmànah mihrâng val rual zawngte khan,
Thlan leh thisen farin an sual chhuak,
“Dam leh tlâng khatah; thih leh ruam khatah”
An pasal\ha thinlung a dài ngai lo.