Russia-in Ukraine a rûn chhunzawm mek zel karah Ukrainian nuai nga chuang zet chuan himna zawngin an ram an chhuahsan tawh niin UN chuan a sawi.
Khawpui lian hrang hrangte chu Russian sipaiten an kah chhunzawm zel a. Khawpui an beih zingah hian Kiev, Kharkiv leh Chernihiv te pawh a tel.
Sorkar thuneitute chuan Thawhtanni tuk thlenga laipuia kah reng a la nih avangin Kharkiv khawpui bikah ringawt pawh civil mi thahnem tak an thi tawh niin an sawi.
Hetih lai hian hmar lam, Belarus nena an inrinaah Ukrainian leh Russian thuneitute chu an indo hnua a vawi khat nan inbiakna an kalpui mek.
Silai puak tihtawp a nih theih beiseina erawh a tlem hle a; mahse, Ukrainian President Volodymyr Zelensky chuan, ‘indona a tawp theihna chance chhe tê a awm’ niin a sawi.
United Nations human rights chief, Michelle Bachelet chuan civil mi maktaduai chuang chu bomb laka himna tura siam chawp, leihnuai rel station-ah te an him nan an tlan khawm tih a sawi.
Ningania Russia-in a rûn atang khan a pisa hian civil mi 102 an thi tawh tih an chhinchhiah a, heng zingah hian naupang pasarih an tel a, mi 300 chuangin hliam an tuar bawk.
“A tak taka a zat chu hei aia a tam daih a rinawm,” a ti bawk.
Russian sipaite hi khawpui ber, Kyiv hmar lam km 30 vela hla an thleng tawh a, Ukrainian-ten nasa takin an lo bei let tih UK Ministry of Defence chuan a sawi.
Khawpui chhungah hian hmun hrang hrangah khawlaia inkahna a awm a. Boruak la ralmuang lo hle mah se ni hnih curfew puan tawh hlih niin mipuiten leihnuai an tawlna atangin an mamawhte an lam.
Hmar leh hmarchhaka Kharkiv leh Chernihiv chu laipuiin Russia hian a kap reng a; mahse, an la la bik lo va. Kharkiv-ah hian chhun laiah shopping centre chu laipuiin kap fuhin khawlaia inkahna pawh a thleng reng.
Russian sipaite hian chhim lam, Russia-in a awp, Crimea bula lawngchawlhna, Mariupol, chu an bei nasa hle bawk a. Russia hian Europe-a nuclear power plant lian ber an la nia sawi awm chu Ukraine hian an pha bawk.