HPC party-in SHC sorkar paihthlak dodalna atana vawiin atanga tiamchin awm lova Sakawrdaia total bandh huaihawt an tum chu Sakawrdai VC-in thulh tura ziaka an ngen avangin thulh rih an remti a. SHC chungchanga MNF leh HPC inremna ang taka kal erawh an phut tih an sawi.
Nimina HPC Gen. Hqrs. hruaitute leh Hmar Ex-volunteer hruaitute thukhawmin Sinlung Hills Council (SHC) sorkar chu dik lo taka paihthlak tuma hmalak a nih thu sawiin, hei hi tha an tih loh thu an sawi a. Hemi chungchangah hian Mizoram sorkar chu dik taka thil kalpui tura an ngen thu an sawi.
SHC sorkar paihthlak tuma hmalakna dodalna atana vawiin atanga SHC Hqrs. Sakawrdaia tiamchin awm lova total bandh huaihawt an tum chu Sakawrdai VC-ten thulh tura ziaka an ngenna zahawm an tih avanga thulh rih an remtih thu an sawi a. Sakawrdai VC ngenna an zahawm an tih bakah mipui hmakhawngaia thulh rih mai thaa an hriat thu an sawi.
HPC Gen. Hqrs. hruaitute leh Hmar Ex-volunteer hruaitute thukhawm chuan SHC chungchanga MNF leh HPC inremnate chu a nihna ang taka kalpui ngei tura Mizoram sorkar an ngen thu an sawi bawk.
Tar lan tawh thin angin SHC-a MNF member pathum leh independent member pathumten February 16, 2022 khan HPC leh MNF tangdunin an siam SHC sorkar an rintawk lohna ziakin an thlehlut a. February 18, 2022-ah SHC special session koh niin, SHC sorkar rintawk lohna thehluttu member parukte chauh special session-ah hian tel mah se, SHC deputy chairman kaihhruaina hnuaiah sorkar lai chu an phar thla a ni.