Chief Minister Zoramthanga chuan Mizoram budget pharh taka a enkawl, finance department-a sum tam tak dah bik anga sawi chu department hrang hrangin an mamawh huna hman theih tura dah hran mai a nih thu a sawi.
Nimina Mizoram Budget 2022-23 chungchang house-a sawi honaah neihah a tawp khartu, Finance Finance Minister Zoramthanga chuan Mizoram budget duan danah a hun azir leh tha bera hriat anga an kal thu a sawi a. “Tun hma kha chuan planning duan danin budget hi an kal mai thin a. Tunah erawh Niti Aayog duh danin plan leh non-plan-ah then loin, sum ruahman chu an duh leh mamawh anga then turin an rawn ti a, a hahdamthlak,” a ti.
Finance changtu chuan tun hma chuan department hrang hrang chu an hnathawhna tur pek vek thin niin, an department-in work-ah an sum neih dan hriat hriat lawk thin a nih thu a sawi a. “Tunah erawh chief minister leh finance minister ka nih hmasak ang kha ni loin, a chi dangin central kal angin kan kal ta a ni,” a ti a. An sum neih chu tlem tetea department-a sem darh a nih chuan hmasawnna liantham kalpui a theih loh thu a sawi.
“Central tih ang deuhin sum neih zat atangin sorkar hnathawk hlawh, pension leh inenkawlna mamawh chhut a nih hnuah sum la bâng atanga hna dang thawhna tur untied fund hman theih zat hriat theih a ni a. Sum chu department zawng zawng an intawm tur leh mamawh huna hman tlan theih turin kan dah mai a ni,” a ti.
Chief minister hian central atanga project hai chhuahna kawngah kalphung hluiah chuan state sorkar tum ve tur chu department-in an neih mang thin loh avangin an buai nasa thin tih sawiin, “Tunah chuan planning-ah leh finance-ah dahkhawm a ni ta a, central atanga sum lo kal do letna tur chu harsa lutuk loin kan nei thei ta a ni,” a ti bawk.
ZPM Legislature Party Leader Lalduhoma chuan kum thum kalta khan Mizoram GSDP thanna chu zaa 19.6 niin, kuminah zaah 16 chauh a nih avangin Mizoram sum leh pai dinhmun a tha lo tih a lantir tih a sawi a. Sorkar leiba leh sum puk chu nakin lawka rulh leh ngai a nih avangin fimkhur a tul thu a sawi bawk.
Congress Legislature Party Leader Zodintluanga Ralte pawhin finance changtuin budget a pharh tak chu budget chhe tak a nih avangin sawihonaah pawh rorel lai member zingah sawi tur pawh an awm lo a, a koha koh chhuah ngai an ni hian an phur lo hle tih a hriat theih thu a sawi.
Budget pharh tak chu thuneihna pumhmawm tuma hmalakna nia a hriat thu sawiin, “Finance-a sum tam tak daha department thenkhat tan sum dah a ni leh si lo hian minister-te tlawn tura thangkamna a ni a, finance dictatorship ang mai a ni,” a ti.