Ukraine-a indona a chhuah chinah thil thleng mak tak tak a tam a, social media-a sawi leh thehdarh hlawh tak tak pawh a tam a. Video danglam tak darh thar leh mekah chuan lo neitu pakhatin Russian sipaite tank chu a tractor-in a hnuk ruau ruau mai a. Amah chu a hnungah a kal hnak hnak thung.
Video hi British Conservative politician, Plymouth Moor View bialtu MP ni bawk, Johnny Mercer-a’n Thawhtannia a tar lak kha a ni.
“Mi thiam ni lo mah ila, inrûnna thleng mek chu tum anga tluang a ni bik lo tih a lang. Ukrainian tractor hmangin vawiin khan Russian APC ruk chhuah a ni,” tiin Mercer chuan Twitter-ah second sariha thui video hi a tar lang a. Mi maktaduai 4.6 chuangin an en tawh.
Video-ah hian a thla latu nui thawm pawh a tawpah a lang.
Video hi kum 2014 atanga 2021 chhunga Austria-a Ukraine ram palai, Olexander Scherba pawhin a tar lang chhawng a. “Ukrainian-te hi an tawrhah an chhel hle a ni,” a ti.
Video hian lawm a hlawhin mi pawh a tihlim a, Ukrainian-ten fak an hlawh phah bawk.
Russian-ten an thenawm ram an rûn mekah hian Ukrainian-te huaisenna fakna thawm a ring hle a. Russian-ten an thlen hmasak ber ramri khuaa mipuiin sipaite an lo hmachhawn dante chuan sawi a hlawh hle.
Video dangah mi pakhatin kut lawnga rahpuah bomb a keng lai pawh a darh chiam a. Kutlawng ringawta Russian tank lo hmachhawna lo tiding lai video pawh a darh.