Bungraw phur lawng lian, car man to tak tak phur chu Portuguese Azores thliarkar awm khawm karah chawlhkar hnih zet a kan hnuah a pil.
Felicity Ace lawng hian car 4,000 vel a phur a, heng zingah hian Porsche leh Bentley te pawh an tel.
German lawngchawlhna, Emden atanga chhuakin United States-a Rhode Island a panna kawng lakah a kang ta a ni.
February 16-a kangmei a chhuah hnu lawkah khan thawktu zawng zawngte chu lak chhuah nghal an ni.
A hnaih ber thliarkar, Faial-a captain, Joao Mendes Cabecas chuan tuialhthei (oil) put a awm an hriat loh thu a sawi a; mahse, metre 3,500 vela thuk Atlantic tuipui mawng a thlen hnuah a tuialhthei (fuel) chu a put a rinawm hle niin a sawi.
Portuguess navy chuan kangmei chhuakah hian tumah hliam an awm loh thu a sawi a, thawktu mi 22-te chu sumdawng lawng, a bul hnaia kal pali hmanga chhanchhuah an nih hnuah khualbukah an thlentir a. Portuguese Air Force-in chhanchhuah hna hi an kalpui niin a tar lang.
Volkswagen chuan an lirthei chhiate chu insure vek a nih thu leh $ maktaduai 155 man vel niin Reuters a hrilh.
Bentley chuan an car 189 a tel thu sawiin Porsche pawhin car 1,100 chuang an phurhtir thu an sawi.
Customer pakhat chuan a Porsche car pawh lawng hian a pilpui niin a sawi a. Mi dang hetianga sawi pawh an awm nual bawk.