Russia-in Ukraine a rûn avanga India sorkarin Ukraine-a India mi awmte a hruai haw zingah Durtlang nula, MBBS zirlai, Rebecca-i d/o David Bishwa pawh telin, tluang takin Mizoram a rawn thleng tawh.
India sorkarin Operation Ganga tih hmanga Ukraine-a India mi awmte hruai haw hna a kalpui mekah February 28-a zirlai 256 a hruai haw a, chung zingah Mizoram mi, Rebecca pawh a tel ve a, February 28 khan Mizoram an rawn thleng a ni.
The Zozam Times zawhna chhangin Rebecca-i chuan indona boruak a sosan chhoh zel hnu, February 25 zing lamah khan Indian Embassy atangin Indian zirlaite chu haw mai thei turin an hriattir tih sawiin, hemi tlai vek hian hruai haw an nih tur thu hrilhin Ukraine chu an chhuahsan tih a sawi.
Rebecca-i chuan an rawn haw kawng chu a bumboh thu sawiin, “India zirlaite min hruai tur khan kan hostel kawtah bus a lo ding a, bus hmang chuan Romania kan pan leh a, Ukraine chhuahsan tur an tam avangin traffic a jam nasa lutuk a, kawng chanve bus-in min thlah a, km 15 chuang chu ke-in airport kan pan,” a ti.
Russia-in Ukraine a rûn hnuah ram chhungah buaina nasa tak thleng mah se harsatna lian tham an tawh loh thu a sawi a, “Keini hi kan vannei a, kan awmna hi a him khawp mai,” a ti a, an rawn haw kawngah ramri an kânnaah pawh harsatna an tawk lo a, inkap thawm an hriat loh thu a sawi.
Boruak rit tak karah India rawn pan mah se India sorkarin zirlaite an buaipui dan chu lawmawm a tih thu a sawi a, “Delhi thleng kha min sponsor vek a, ei tur tui tha tha min pe,” a ti.
Delhi an thlena sorkar laipui hotuten an dawnsawn dan chu ropui a tih thu Rebecca-i chuan sawi bawkin, “Delhi kan rawn thlen khan union minister-ten min lo hmuak a, chutah thlawhna atanga kan chuan chhung khan zirlai tinte kha rose min lo pe vek bawk a, kha feeling kha a ropui lutuk a, sawi ngaihna a awm lo,” tiin a sawi.
Rebecca-i chuan Ukraine boruak a ziaawm hunah a zirlaite chhunzawm tura a kir leh ngei tur thu The Zozam Times a hrilh bawk.