Kashmir-a sikulte chu venhimna thil avang leh Covid-19 leng avanga thla 31 zet khar a nih hnuah hawn a ni veleh ta.
August, 2019 hnu lama a vawi khat nana inhmu leh chauhte an awm avangin zirlaite zingah an thiante hre ta mai lote pawh an awm.
Hun rei tak zirna in khar a nih chhung hian August 5, 2019-a danpui hmanga Jammu & Kashmir hung bikna hlih avang khan thla 18 zet chu internet hman theih lohva dah niin zirlai tam tak chuan online pawhin lehkha an zir ve thei lo.
Nilaini atang khan zirlai nuai chuang chuan sikul an kai leh tan ta a. Zirlaite chuan an sikul khar chuan an zirna piah lamah mi dang nena nunhona leh inngainat tawnna te a tichhe hle niin an sawi.
“Keimah chauh pawh a ni lo, mi dangte pawhin mi kan inhai nasa hle a. Kan bus number leh kan class pawh ka theihnghilh tawh a. Tute nge ka la hriat hlawm tih ka hawi kual ruai a ni,” tiin Delhi Public School, Srinagar pawl 9 zirlai, Qariya chuan a sawi.
DPS, Srinagar-ah hian zirlai 4,500 vel zet awmin rei tak hnua zirna in an hawn leh hian zirlaite lawmna lian tak buatsaih a ni a. Sikul hawn tirh chawlhkar hi ‘hlimna chawlhkar’ tiin sikul tam takin a hming vuahin an hmang dawn.
Qariya-i hian sikula kal leh chu a phur rualin a thiante nen rei tak inbe pha tawh lo an nih avangin a zah thu a sawi.
“Hun hmasa lamah kha chuan naupang harh vang tak kha ka ni a. Mi tin ka be kual a, tunah erawh ka zakzum ta hle a, hei hi tun hnaiah mi ka kawm tlem vang a ni mai thei a, mi bula sawi tur ka hre tawh lo a ni,” a ti.
Sikul khar tirha feet ngaa sang, Sheikh Mustafa pawh feet ruk zet a ni hman bawk a. Ina thla 31 chuang tawm hnuah chuan mi kawm a thiam ta lo hle tih a sawi.
“Thla 31 hnuah chuan thian leh zirtirtute hmuh chu kan lai hle tawh a. Inkawm kan thiam tawh lo hlawm,” a ti.
Zirtirtuten sikul ruak huai mai chu in hrang ang mai a nih thin thu leh tunah erawh chuan zirlaite hlim thawm nen, a lo nung leh ta tih a sawi.
“Thla 31 hnuah kan nung tha leh ta ni maiin ka hria a. Kan dam a. Keini zirtirtute hi chawlh nei miah lovin kan kal reng a; mahse, sikul building-te hi in hrang ang mai a ni a. Sikulte hi a reh ruai mai a, vawiinah erawh nunna a lo nei leh ta a, hetiang renga a nun zel hi kan duh a ni,” tiin zirtirtu, Syed Sumaira chuan a sawi.
Kashmir-ah hian zirlaite zirna kawng hi an him lohna tuartu lian ber a ni a. Inlak hran tum te, curfew leh inkhuahkhirhna hrang hrang avangin kum 30 liam ta chhung khan an zirna a tibuai hle.
“Zirna hi engmahin a tihbuai tawh loh kan beisei tlat a ni,” tiin zirtirtu dang pakhat chuan a sawi bawk.