A ramin a ko a, a mipuite’n an au. Hei hi atan chhan harsa a ni lova, inngaihtuah buai a ngai hek lo. An ram runtu Russia laka Guitar lo lek aiin, silaia lo hmachhawm mai chu Andriy Khlyvnyuk tan duhthlan tur awmchun tak meuh a ni ta.
Ukrainian band lar Boombox member Andriy hian a microphone hum aiin sipai inthuama inbeih a thlahlel daih zawk a, Guitar dah tha sauh sauhin assault rifle nen Russian sipai beilet turin a theihna zawng zawng sawmkhawmin a dingchhuak a ni.
Kum 42 mi hian, “Musician te hi remna siamtute an ni Mahse, tun hi guitar play hun a ni tawh lova, silai lek hun a ni ta. Min bomb un un miau a lawm le,” tiin Euronews a hrilh.
Musician lar tak hian a fate chu ngaihtha takin a nu enkawlna hnuai ah dahin, ral hmatawng lamah a insaseng fel tawh a, hnung lam hawi tawh rih lo turin an ram run a, nasa taka bomb thlak mektu te laka Ukrainian thisen takzia a lantir mek a ni.
Andriy ang bawk hian Ukrainian sipai ni kher lo- eizawnna in-ang lo tak tak, lar leh lar lo thlengin silai an hum far hlawm a, indo a chhuah atanga ni riatna ah hian tum leh beisei angin ralthuam leh kawng eng-kima tha zawk Russian sipaite’n hma an sawn vut vut thei rih lo.