Manipur assembly inthlana duty-a kal, 2nd IR Bn te chu Bishnupur district atanga Tamenglong district-a an insawnnaah nimin zing dar 1:30 vel khan an chuanna motor chesual avangin C/516 K. Lalawmpuia, Champhai Bethel chu a boral a, mi dang 10 an hliam.
2nd IR Bn hotuten The Zozam Times an hrilh danin, Mizo sipaite hi Bishnupur district atanga an insawnna, Tamenglong college chu motor lian a luh theih loh avangin motor lian thlen theih chin atangin Pik-up truck-in a thiar a. Trip hnuhnung ber chu brake fail-in an chesual a, K. Lalawmpuia chu damdawi in panpui a nih laiin a boral a, mi dang 11 hliam tuarte pawh RIMS, Imphal-ah enkawl zui an ni.
K. Lalawmpuia ruang hi nimin vek khan Manipur police hotute ruahmannain thlawhna hmanga Mizoram panpui nghal a ni a. DGP Manipur-in Imphal airport thlenga thlahin, nimin vek khan Lengpui Airport atangin an khua, Champhai panpui nghal a ni a, vawiina vui tura ruahman a nih thu 2nd IR Bn hotute chuan The Zozam Times an hrilh.
Home Minister Lalchamliana’n he vanduaina thleng chungchang hi nimin khan assembly budget session neih mekah house a hriattir nghal a. Vanduaina tawk chhungte a tawrhpui thu leh hliam tuarte dam thuai tura a duhsak thu a sawi bawk.
Hliam tuarte (2nd IR vek)
- SI RC Muana
- Hav. Lalbiakmawia
- Hav. VL Dingliana,
- Hav. R Lalbiaknung
- Cst. Lalhlimpuia
- Cst. Lalmawi zuala
- Cst. Lalbiaknunga
- Cst. R lalnunmawia
- Naik. Lalsawmliana
- Hav. Lalsangzuala