Engnge maw Russia leh Ukraine buaina hi ni reng reng le?
An buaina hi Russia President Vladimir Putin-a’n February 24, 2022 khan sipai chakna hmanga Ukraine run tura thupek a chhuah atanga intan a ni hran lova. 1991 kuma Ukraine-in independence a puan phat atang khan ram pahnih te an inngur tawn nghal deuh mai. Independence puan hmâ zawng khan Ukraine hi Russian empire-a awm a ni. 2021 phei kha chuan thup hleih theih lovin an intai hlak hlak. 2019 a lo thleng a, fiamthu thiam actor hlui Volodmyri Zelendsky chu Ukraine President ni tura thlan tlin a ni ta a, January 2021 ah US President Joe Biden hnenah a ramin NATO zawm an duh thu a thlen ta mai a, 2008 kuma thutiam lo awm tawhsa a lo ni bawk nen, a ngen ngawl hle. Hei taka hi Russia hlauhthawn rûkna a chawk tho ta a, hun rei tak boruk sa angreng tak inmung a puak chho ta a ni ber. Russia hian Ukraine ramri-ah ‘training exercse’ tih hmingpuin, a inzarpharh ta a, February 24 khan a run ta a ni.
NATO hi?
North Atlantic Treaty Organisation (NATO) tia hriatlar hi European ram 28 leh North American ram pahnih te inkara sipai lam thila thawhhona niin, April 14 1949 khan din a ni. (EU member Austria, Cyprus, Finland, Ireland, Malta leh Sweden te hi NATO ah an tel lo) Indopui pahnihna in a hrinchhuah te pawh a tih theih awm e. Russia leh Ukraine buaina hi Ukraine-in US hnena NATO zawm a duh thu a ngen nen khan sawi hran theih a ni lo. NATO hian 2008 khan Ukraine membership a nih tur thu a lo tiam ve thlap bawk.
Ukraine-in NATO zawm ta se,
Russia tan a pawi viau em ni?
NATO member ni tura Ukraine han dah chhin hian Russia tan a lawm-awm loh. Russia ram leh helai bial vela a huhang tizuzui nghal thei tura ngaih a nih avangin pawm theih a ni lo. An ramri a him lo tial tial tura ngaih a ni a, NATO member dang panga te nena ramri in\awm mek a lo neisa bawk nen, a mangangru viau te pawh hi a awm lo lem hran love.
Heti taka Russia-in Ukraine laka thikthu a tichhe vak hi?
Chhan tam tak a awm thei ang. European Union leh NATO zawm tuma Ukraine hmalakna reng reng a tir phat atang tawh khan Russia hian a lo hnawl char char tawh. President Putin phei chuan Ukraine hi a ta neih tlat pek a, firfiak hovin an hnehchhuh mek, tiin a sawi fo thin. 2014 kuma Russian lam awn, Vikto Yanukoych paih thlak a nih atang phei kha chuan Ukraine hi hnuchhawn thiangah a ngai lo. Hemi kum vek hian Ukraine bungkhat Crimea chu sipai chakna hmangin silai hmet puak lovin Russia hian a chhuhsak hmiah.
Ukraine hi Russia ram bungkhat a ni réng em?
USSR pengkhat a nih hmâ atang tawh khan ram pahnih te hi Russian empire-a awm an ni a. Ukrainian Soviet Socialist Republic hi 1922 kuma Soviet Union hmuchhuaktu member a ni hial. Soviet Union emaw Union of Soviet Socialist Republics (USSR) hi 1992 atanga 1991 thleng khan khawvela ram lian ber niin, Moscow hi an khawpui a ni. 1991 kuma USSR a keh darh khan Ukraine pawh hi independent ram ni turin a dingchhuak.
Eng ram te’n nge Ukraine hi thlawp le?
NATO member te tiamin UK, Canada, Australia, New Zealand Japan, te’n an thlawp tha.
Russia thlawp tlattu te hi le?
Armenia, Belarus, Kazakhstan, Kyrgysztan, Tajiskitan, Cuba, Nicaragua leh Venezuela te hian Russian sorkar an thlawp tha bawk.
Russia – Ukraine buainaa India dinna min hrilh thei em?
Indo buaina chhuak mekah India chuan dawhkan kila chingfel turin ngenna a siam a, boruak chhe tial tial leh raltlan pung zel chungchangah an ngaihtuah hle niin, Prime Minister Narendra Modi-a’n European Council President Charles Michel nena an biaknaah a sawichhuak. India tan Russia hi \hianhlun \ha tak a ni a, engtik lai mai pawha inngheng reng an ni, te pawh a tih theih awm e. USSR hun lai daih tawh khan Goa leh Kashmir chungchanga UN-a thutlukna siam tumnaah USSR khan veto power hmangin India hi vawi ruk a lo chhan tawh a ni. Tun tumah pawh India hian UN-a demna vote lak vawi hnih thlengah ngawih a chuh ve ve.