Enzui ngai Govt. Complex rama in ding ho
Assembly session neih mekah Govt. Complex ram chhungah pass nei lova in ding 403 an awm thu sawichhuah a ni a, speaker pawhin ngaihtuahtu tur committee din a tul thu a sawichhuak hial.
Hre deuhte sawi dan phei chuan Govt. Complex ram chhungah hian sorkar ramah in sa an awm nual a, heng mite hian in an rel tawp a, an luah zui hnu phei chuan an ram chu an nei zui mai niin an sawi. Hetiang zel a nih chuan ram ruak a awm thei lo ang a, sorkar in chhuhsak pawh tum se, buaina chhuak hialin an tang ngam tawh dawn tih a hriat reng bawk. Vei zui ngai tak a ni.
Revenue Minister Lalruatkima’n zawhna a chhan danin kum 2019-20-ah Govt Complex, Luangmualah Cadastral Survey MIRSAC leh department thawk dunin survey an nei a, survey report atanga a lan danin, LSC nei 33, pass nei loa in ding 403, land lease pahnih, house pass paruk a awm a ni. Speaker in a sawi chhunzawmnaah, ngaihtuahtu tur committee din a tul thu leh chutiang tihpui tur chuan house member-te a ngen tih a sawi a, “Khutiang zat in ding khu kan thiat lek lo ang, Eight Legislative Assembly hian i ching fel ang u,” a tichhuak hial a ni.
Sorkar hian a duh chuan a chingfel thei chiang a, ngaihtuah hmasaah neiin, a tul angin hma la se la, in neitute pawh ngaihngama an awm theih dan tur thlengin hma la thuai thei mawlh teh se.