Hmingchhiatna neiten sorkarah dinhmun an chelh dawn lo : Congress president


Congress party President Lalsawta chuan a kaihhruai sorkar hnuaiah hlemhletna leh duhamna avanga ram rorelna a chhiat loh nan minister leh MLA hmingchhiatna neiten sorkarah dinhmun an chelh dawn lo tih a sawi.
Inrinni khan Congress party elected OB-te chuan Aizawl Press Club-ah thu thar thehdarhtute kawmin Lalsawta chuan, “He thu hi ka sawi huai chhan chu a tul vang a ni. Inthlan lo awm turah Congress kan sorkar chuan, hotute remhriatna anga chief minister ka nih hlauh chuan minister emaw, MLA emaw, nihna pawimawh nei sorkara mi zahawm dinhmuna ding chutiangten chhan mumal taka hmingchhiatna an neih chuan ka bân ang. Tu mitmei mah ven a hun tawh lo,” a ti.
Congress party president chuan sum hmanga voter lei a, ram rorelna luah hi ram leh mipui tan ram tlukchhiat hlen theihna a nih avangin inthlana sum chakna hi tihhlum (thah) an tum tih sawiin, “Inthlan lo awm turah hian, inthlana an tlin theihna tura an sum an hman dawn pawhin, chu sum chu tihhlum kan tum a ni. Tharum kan thawh lo ang. Lamtang kan ngah tih kan hria a, mipuiin kan duh hi an duh a ni,” a ti a. An candidate te sum hmanga inlei tlin tum lo tura an thunun dawn tih a sawi.
Sorkar khap smuggling hi ram tluk chhiatna bul, mafia leh cartel ten ram rorelna an luhchilhna bul intanna a nih theih avangin an do thu a sawi a. “Officer te’n anmahni tana hahthlak leh pawi khawpin dan loa sumdawnna man chhuah tuma an chet laiin, sorkar chu a lehlam zawkah a tang ta tia ngaih loh theih lohin kan hmu a, kan hria a. Hetiang sorkar tan tur lam pawh hre lo, a sual lama tang tlat sorkar hi chu awm rei tlak an ni lo. Inthlanah an tla ngei ngei tur a ni,” a ti a. Congress chuan smuggling hi an do tlat thu a sawi bawk.
Lalsawta hian, ramin a mamawh ber chu sorkar tha a nih thu leh, sorkar tha nei turin ‘political will’ neia ram leh mipui tana tha an tihna tur daltu apiang chu an sut tlang tur thu a sawi a. “Mipui tana rawng kan bawlnaa tha ber tur kan tihna kawngah hian kan chhungte, veng te, kan laichin hnai an ni emaw, kan party an ni emaw, tute emaw intelkhawm mipuiin kan hlauh rawn leh tlawn rawn titih pawh nise, political will hmangin kan su tlang ang,” a ti.

Ram roreltu leh ram chhunga eirukna, duhamna leh induhsakna dik lo, restricted tender hman te, a mawhphurtu hriat theih loh khawpa contract hralh leh hnathawk chhe lutuk hi, mipui chhiat tlingkhawm atanga tih vek a nih avangin Congress sorkar hun chuan an tihbo tur thu a sawi a. Mi rethei rahbi tleu, chan hai, khaw eng hmu pha lo te tan mihring zahawmna vawng him thei tura an chanpual siamsak an tum thu leh thalai, kuthnathawktute pawh an mamawhna zawn takah ‘Tang Puihna’ an buatsaih tur thu a sawi bawk.

Mipuite an that vang reng pawh ni loa sorkar remruatna fing leh tha vanga an that a, an taimak a, an rinawm a, kan ram a lo changkan theihna’n ‘That loh theih lohna bawm’ sorkar siam an tum thu a sawi a. Ram rorelna felfai nei turin sorkar tha, dik, chak leh huaisen neih an tum thu a sawi.

Congress party hruaitu thukhawmin an kal zel dan tur leh hmachhawp an duante thu thar thehdarhtute hmaa an puan chungchangah MPCC President hian, party puipate’n rem an tih dan anga puang an nih thu leh inthlahrunna an neih loh thu te, a tha zawnga ram siamthatna tur a nih chuan tu mitmei mah an ven loh thu an sawi a. “Vawiina kan sawi teah hian din ngheh kan tum lehzual a. Hun kal tawha kan tihfel tawk loh leh tihdik tawk lohnaah te min theihnghilh sak a, hun remchang min siamsak turin ka ngen a. Kan danglam ngam a, kan danglam dawn a ni,” a ti.

MPCC Treasurer Zodintluanga Ralte chuan, Congress president Lalsawta’n hmingchhiatna nei MLA leh Minister ban an nih tur chungchang a sawi chu, an party rorelna sang ber OB meeting in a nemngheh a nih thu leh, thu thar thehdarhtute hmaa intih that leh fel tum vanga sawi mai mai a nih loh thu sawiin, “Minutes hnana OB in a nemngheh a ni,” a ti a. Minister leh MLA te mai bakah, sorkar hnathawk zawng zawng pawh a huam tel nghal tih a sawi bawk.

Zawhna chhangin MPCC President Lalsawta hian, Congress party in ram hruaitu tura an beiseite chu qualification pathum chauh – rinawm tur, an duham tur a ni lo; an hlawhah an lungawi tur a ni tih leh an taima tur a ni – tih a nih thu a sawi a. Kum 2023 inthlanah chuan Election Commission of India in candidate te sum an hman theih chin a bithliah leh MPF ina sum seng tam lo tura theihtawp an chhuah ang tihhlawhtlin an tum thu a sawi.

“Mipuiah sum seng a, ‘sum ngah ngak hmeltha’ tih ang hi chu, ngen kan duh chauh niloin an chakna thahrui an sum ngahna hi engmah loah chantir kan duh a ni. Sum ngah leh hausa tak takte pawh keiniah pawh an awm, kan hnawl chuang lo a; mahse, an sum ngah hmanga voter lei a, ram rorelna an luh dawn chuan an tel loin kan kal a ngai ang,” a ti.

He hunah hian MPCC Vice President Lal Thanzara’n ‘That Loh Theih Lohna Bawm’ lehkhabu, Congress president Lalsawta buatsaih a tlangzarh nghal a. He lehkhabu hi Congress MLA Lalrindika Ralte publish a ni.
The Zozam Times-in politics chawlhsana MLA inthlanna din a tum tawh lo tia a lo sawi tawh chungchang zawhna chhangin MPCC Lalsawta chuan, “Khatih lai khan politics chawlhsan ka tum a, a hunin ka hria a, ka kum pawhin a remti tawh lo. Mahse, boruak a lo dang a, kan party president-in chawlh a tum tak tlat si-ah chuan president ka nihna hi ka koah a lo tla a. President ber ka chawlh kha a remchang lo ang tih a hlauhawm a. Mahse, chu chuan inthlanah ka ding ngei ang tihna a ni lo. Amaherawhchu, din a tul chuan din a ngai dawn a ni,” a ti.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427