Tun hnaiah tribal ni lo, Mizo hming hmanga tribal certificate nei pakhat a awm nia hriat a nih thu leh a tribal certificate hi cancel-sak a la nih loh thu Home Minister Lalchamliana’n house a hrilh.
Assembly session neih meka ZLP Group Leader Lalduhoma zawhna, ziaka a chhan danin tun hnaiah schedule tribe ni lo Mizo hming hmanga scheduled tribe certificate nei pakhat a awm nia hriat a ni a. A hming chu Kamrul Laskar Islam niin, a Mizo hming Kamlova Chhangte a ni. A tribal certificate hi tun dinhmunah cancel-sak a la nih loh thu a sawi bawk.
Home minister hian tun hma lamah tribal ni lo tribal certificate siamsak pahnih – Deepak Pradhan/D.K. Pradhan, a Mizo hming David Lalhmangaiha a ni a, pakhat zawk chu M.K. Khan niin, a Mizo hming P.C. Thankima te an nih thu sawiin, an tribal certificate hi cancel-sak an nih thu a sawi thung.