Myanmar ram buaina avanga sahimna zawnga Mizorama raltlante enkawl nan sorkarin Rs nuai 380 a seng tawh.
Assembly session neih meka Home Minister Lalchamliana’n ZLP Group Leader Lalduhoma ziaka a zawhna a chhan danin, February 12, 2022 thleng khan Mizoramah sorkarin a chhinchhiah danin, Mizoramah raltlan 24,289 an awm a. Heng raltlante hi Mizorama district hrang hrangah awmin, Siaha district-ah tam berin mi 8,381 an awm a ni.
Raltlante hi a sorkarin a ruahman refugee camp/shelter-ah leh khawtlangin camp a siamsakah an awm a. Mahni chhungkhat/laina hnaite bula khawsa bakah in luahte pawh an awm a ni.
Raltlante enkawl nan hian Mizoram sorkarin Rs nuai 380 seng tawhin, sorkar laipuiin state sorkar hnenah raltlante enkawl nan hian kawng hrang hrangin sum a pe thin a ni.
Myanmar atanga raltlante Mizoram sorkarin a enkawl dan ziaka INC member Ngunlianchunga zawhna home minister-in a chhan dan chuan refugee-te enkawl nan hian Mizoram sorkarin Rs nuai 380, Deputy Commissioner-te kaltlangin a pe chhuak tawh a. Hemi hmang hian refugee camp-te sak a ni a, refugee camp-a êng pawh luh nan te, tui dah khawlna tur leina atan te, ek in (pit latrine) sakna atan te, thawmhnaw lum, mutbu bakah sum faia tanpuina atan te, ei leh in leina atan te, Myanmar refugee zinga MP leh MLA-te tanpui/chhawmdawl nan te leh raltlante enkawlna tura DC-te hma lo lak tawkna sum mamawh phuhruk nante a sem chhuak a ni.