Pathianni khan Ukraine rûn mektu, Russia ramah indo duh lohna lantirtu mi 4,300 chuang zet man an ni tih mihring dikna chanvo humhalhtu pawl leh Russian thuneituten an sawi.
Moscow khawpuiah ringawt pawh mi 1,700 vel man an ni tih Ria news agency chuan interior ministry puan a tar lang.
OVD-Info rights group chuan khawpui 53-ah indo duh lo hi man an ni tih a puang.
Russia-ah hian thil duh loh leh dodalna lantir hi tun hnai kum eng emaw ti atang khan phal loh a ni a; mahse, tuna an ramin an thenawm a rûn hnuah erawh duh lohna lantir a nasa hle.
OVD-Info chuan ni 11 liam ta chhungin mi 10,000 chuang man an ni tawh tih a sawi.
OVD-Info thupuangtu, Maria Kuznetsova chuan, “Hetiang thil hi khap a ni a, sipaiten khap tam tak an nei,” tiin Georgia-a Tbilisi atangin Reuters news agency a hrilh.
“Vawiinah erawh duh lohna lian tak kan hmu nawlh a, Siberian khawpui lianah pawh a ni vek a, hetianga tum khata mi man tam hi a thleng khât hle,” a ti bawk.
Kar hmasa tir lamah khan pawisa tihchingpen thubuaia tan ina khung mek, sorkar eptu, Alexei Navalny-a chuan ni tin duh lohna lantir turin amah thlawptute a ti a. “Russia hi mi dawihzepte tihthaihtu ram a ni tur a ni lo,” a ti.
Russia-n Ukraine a rûn duh lohna hi an ram chhung mai bakah an ram pawn lama anmahni thawhpuitute ram ngeiah pawh lantir a ni hlawm.
Moscow thian tha tak, Kazakhstan-ah pawh mipuiten indo duh lohna lantir nen kawng an zawh a. Almaty khawpuia Russian chet dan duh loh lantirnaah hian mi 2,000 vel an tel.
Belgiuam khawpui, Brussels leh London khawpuiah pawh indo duh lohna hi lantir a ni bawk.
Ukraine ram chhungah pawh Russian sipai awm mekte chuan chhim lama Nova-Kakhovka khawpuia anmahni duh lohna lantirtu mipuite hnawh darh nan silai an hmet puak.
Kherson region-a khawpui pakhata thil thleng video darhah chuan mipuite chuan Russian-te chu ‘haw r’u’ an ti a. Silai leh grenade puak thawm pawh hriat a ni a. Mipuite hi chhuatah an bawk a, an zinga mi pangain hliam an tuar nia sawi a ni bawk.