Prime Minister Narendra Modi chuan Thawhtanni khan Russian President Vladimir Putin leh Ukrainian President Volodymyr Zelensky te chu telephone-a biain Ukraine khawchhak lam, Sumy khawpuia indona thlen meknaa Indian tangkhangte hruai haw dan tur a sawipui.
Russia-in Ukraine a rûn hnua India-in a mite hruai haw hna a thawh mekah hian tun hnai ni reilo te chhung hian Sumy-a mi 700 vel hruai haw chu a tum lian ber a ni.
Ukraine atang hian Indian 16,000 zet a hruai haw tawh a. Heng zingah hian khawchhak lama Russia-ten an kah nasatna lai hmuna mite pawh a tel.
Modi-a hian Zelensky-a be hmasain Ukrainian sorkar chu Sumy atanga Indian hruai haw tumnaah pui zel turin a ngen.
Minute 35 chhung an inbiaknaah hian hruaitu pahnihte hian Ukraine-a thil thleng mekte pawh an sawi dun a. Modi-a hian hmaichhana inbiak (direct dialogue) chu inremna turin a la sawi mawi reng.
Zelensky-a hnenah hian a sorkarin Indian hruai haw beihpui a thlaknaa a puihnaah lawm thu a hrilh bawk.
Putin-a hnenah pawh Sumy atanga a rang thei ang bera Indian hruai haw chu a pawimawh ber tih a sawi a. Putin-a pawhin ‘a theih ang anga puih’ a inhuam thu a hrilh.
Minute 50 chhung vel an inbiaknaah hian hruaitu pahnihte hian Ukraine-a thil thleng mek an sawi dun nual a. Putin-a hian Ukrainian leh Russian team inbiak tawh dan chanchinte pawh a hrilh.
Modi-a hian an team ve ve an inbiak bakah Putin-a chu Zelensky-a nen hmaichhana inkawm turin a ngen a. Inkahhai puanga mipuite insaseng theihna tur kawng a hawng chu lawmawm a tih thu a hrilh bawk.
Sorkarin thuchhuah a siamah Zelensky-a hian Modi-a hnenah hian an buaina leh inbiakna kal mek chanchin a hrilh a. Modi-a chuan ‘buaina chu a ngaihvenin mihring tawhna thleng pawh a ngaihtuah reng’ tih a sawi tih tar lan a ni.
Modi-a hian tharum tahwhna chu tihtawp a duh thu a sawi a, ‘muanawm taka thil chin fela inbiakna neih chu a tha ber a nih thu’ a sawi ve bawk tih tar lan a ni.
Ukraine-a Indian zirlai la awmte himna leh him taka an haw theihna chu a ngaih pawimawh ber a nih thu sorkar thuchhuahah hian tar lan a ni.
Tun tum hi Europe khawchhak lam ram pahnihte inkara innghirnghona a chhuah hnuah Modi-an an hruaitute phone-a a biak vawi hnihna ve ve a ni.
Zelensky-a leh Modi-a hi February 26 khan an lo inbe tawh a, hemi tum hian United Nations Security Council-a an ram thlawp turin prime minister hi a ngen a. Hemi tum pawh hian Modi-a chuan tharum thawhna titawpa inbe turin a lo ti tawh.
Modi-a leh Putin-a inbiak hnuhnung ber chu Russian president-in Ukraine khawchhak lama Donetsk leh Luhansk-a indan tum sipaite puihna nena Kyiv rûn tur thu a pek hnu lawk a ni ve thung.
India hian tharum thawhna a chhuah hma, inepna boruak lian tak a awm lai atang tawh khan palai tira inbiak hi a lo rawt tawh a. UN thukhawma Russia demna thu tihtluk tura vote thlaknaah pawh Moscow nena an inkungkaihna a that em avangin India hian vote a thlak ve lo va. New Delhi chuan tute pawhin mi ram zah turin a ti bawk.
Indian sorkar hian ‘Operation Ganga’ tiin Ukraine-a a mite tangkhang hruai haw beihpui a thlak mek zel a. Charter flight leh sipai thlawhna hmangin Pathianni thleng khan mi 15,900 a hawopui tawh a. Thlawk haw tur eng emaw zat an la awm sa bawk.