Health care bill hi rin chi a la ni zel ange maw?
Sorkar in sum a neih lohzia kan hria a, pawl hrang hrangin an theihna zawn zawnah nawr thin mah se, hmasawnna a rualkhai thei meuh lo. Chhungkaw tin huap health care bill thlengin a tang nghek nghuk a, sorkar kum tharah erawh chuan pek that theih beisei tawh a nih thu finance changtu, chief minister berin a sawi laih laih chauh bawk.
Hetiang hi kan dinhmun a nih avangin chhungkaw tam tak an beidawng a, health care renew hun hawn mekah pawh hian chhungkaw tam tak chuan inziahluh an phur loh phah a, ration card mila pawisa sen ngai zat sang chho zel pawh chhungkaw tam tak tan chuan phurrit a ni ta der mai bawk.
Bill an pek that theih loh avangin mipui pawh an zahawm tawh hle tih CM hian house-ah sawichhuakin, “Sorkar kum tharah erawh ram sum leh pai dinhmun pawh a ziaawm chho ang a, he scheme hnuaia damlo inenkawlna bill pawh mipuiin a hma ai chuan an lak that theih beisei a ni,” a ti a, beiseina thamral min hnutchhiah loh hram beiseina nen mipuite chuan kan thlir leh dawn phawt chu a ni ber e.
Health care bill hi a tha hle a, pawisa awm nise chuan chhungkaw tin huap a nih avangin chhungkaw tam tak an mangang lo ngei ang. Mahse, kum liamta a mite, a hmasa leh lama mite pawh tihfel hleih theih a la ni lo miau a, beiseina neih thiam hi a harin, rinna nghah a har zel mai a. Sorkar hian a ti laklawh a, mipuite sum thawh khawm ring lui chho ngar ngar chung hian a hmasak dan indawtin a kalpui mai mai nia rinna a lian telh telh bawk. Tan a lak zual chu a ngai hle tawh a ni.