Smart classroom project enzui deuh a ngai?
Assembly session neih mekah Mamit District chhunga sorkar high school 15 te chu Smart Classroom Project kalpui tur atana thlan an nih thu tarlan a ni a, hei hi Information & Communication Technology (ICT) Department hnuaia thawh a ni. Heng school thlanchhuah 15 zinga a tam zawk, high school 9 te hi Hachhek Constituency huamchhunga mi an ni bawk.
Heng an hnathawh leh sum awm dan thlir hian Hachhek Constituency Development Committee (HCDC) te chuan enfiah tul an ti a, committee neiin, enfiah an duh thu hial an sawi chhuak a, engemaw dik lo deuh a awm emaw ni chu aw, a tih theih awm e.
Heng school thlanchhuahte tan hian, school pakhat zelah smart classroom project kalpui nan Rs 17.50 lakh zel ruahman a ni a, a sawifiahtu lamin GST paih a ngaih thute sawi ve bawk mah se, GST paih hnu pawh hian Rs 12/13 lakh chuang a la ni dawn a, an hnathawh dan leh hmanraw dah thenkhat en hi chuan a felhlel deuh mai ang a, tih hlauhawm tak a ni.
HCDC lam hian a endiktu tura ruatte pawhin uluk zawka an endik an duh thu an sawi a, an tih tur leh dah tur chin a kim em tih thlenga enfiah an duh thu leh estimate nen a inmil em tihte uluk taka en an duh thu an sawi bakah, puih an ngaihnaah puih an inhuam thu hial an sawichhuak a, sorkar leh thuneitu lamte pawhin enzuiin, he hmasawnna hnathawhah hian dik lo a awm loh nan fir leh fair zawka hnathawh an duh thu an sawite hi ngaih pawimawh ni se la, a hnu lehzela mualphona thleng thei laka fihlim ngei tumin hna tha thawk mawlh teh se.