- Lallunghnema, Charity Lodge
World Consumer Right Day chibai ka buk a che u,
Naktuk mai hi World Consumer Day a ni a.
He World Consumer Day hi March ni 15-ah hman a ni thin a. Kumin pawh hian khawvel ram hrang hrangin an hma ng leh dawn a ni. World Consumer Day hi USA, President John F.Kennedy-a’n kum 1962 March ni 15 -a US Congress-a Four Consumer Basic Right- a a puan chhuah hriat reng nana hman thin a ni a. He March ni 15-a John F.Kennedy-a’n 4 Consumer Basic Rights a puante chu: 1) to choose freely 2) to be heard 3) to be informed 4) to be safe. Heng consumer right puanchhuahte hi USA ram chhunga Consumer-te dikna leh chanvo humhalhna kawngah nasa takin a tangkai a ni.Consumer Bill of Rights duan chhuahnaah pawh kawng ro a su em em a ni.
John F.Kennedy-a khan US khua leh tuite zalenna leh hamthatna chu a vei hle a. Sumdawng lian puipuiin an nawm an maka mipui zalenna an rahbeh thin chu tha a ti lova. Thil zuartu leh hralhtute inluling thin chu a vei hle bawk a ni.
Hetianga Four Consumer Basic Right US Congress-a puan chhuah a nih hnu hian Consumer Bill of Rights chu ram pumah hman a lo ni ta a. Consumer-te pawhin nasa takin an lo chhawrin an lo tangkaipui ta zel a ni. Tun thleng hian John F. Kennedy-a hming hi hriat reng a ni ta. US President huaisen hi a khua leh tuite tan pawh a thlamuanpuiawm hle ngei ang. Khawvel pumpuiah Consumer-te tan phei chuan a hlu leh zual ngei ang. A ngaihtuahna ropui tak avangin tun thleng hian kumtin khel lovin World Consumer Day hi kan lo hmang thei ta a ni! I lawm ang u.
Kan sawi thin tawh angin World Consumer Day thupuite hi Consumer International chuan kumtinin a thlang chhuak thin a. Kumin atan hian Fair Digital Finance tih chu thlan chhuah a ni a. A awmzia nia lang chu, ‘Digital hmanrua hmanga thianghlim tak a sumdawn,’ tih a ni mai awm e. Internet hmanga sumdawnna hi tunah hian khawvel ram tam takin an kalpui mek a. Internet-a sumdawn hi a awlsam a, a zangkhai a. Chutih rualin hetianga sumdawnna hi a bawlhhlawh awlin a thianghlim lo thei thin a. Chuvangin hetianga Consumer International-in thupui atana Fair Digital Finance tih hi a thlang thil tihawm tak a ni. Kan tunlai khawvel Digital Age-ah hian inbumna hi a hluar hle mai a. Khawvel ram ropui leh thil tithei tak tak USA, China European Countries, Asia khawmualpui ram hrang hrangah te, South America khawmualpui leh Africa khawmualpuiahate hian account hmang pawisa inlaksakte a hluar hle a ni. Mahni kher kal ngai lovin money transfer a tih theih tawh a; ziak kher lovin pawisa a draw theih tawh bawk a ni. Bill chi hrang hrang pawh a pek theih tawh bawk. Mahni inlan kher lova thil chi hrang hrang tih theih a ni tawhte hi a tha hle a. Mahse pawisa thilah hian thil tamtak tihsual theih a niin thil tam takah chhiatna thlen theih a nih avangin consumer-te an fimkhur a ngai em em a ni.
World Consumer Right Day lawmna pualin he Consumer Commission pakhat judgement pakhat hi ka han chhawp chhuahsak teh ang che u. Thawnthu sawiin kan sawi tawh ang.
Tin, heti hi a ni a, Mizo tawng thiam miah lo Vai tlangval Vamsi leh a thiante chu Lucky Byriani House-ah Byriani ei turin an kal a. Byriani House chuan an byriani man atan Rs.1127.50 zet a lo la a. Byriani man pangngai aiin Rs 5.50(excess) an lo la tam a ni a. Tichuan, heng thian dun hi a man dik tak aia sanga he Dawr hian an lo chawitir avangin Hyderabad District Consumer Commission hnenah complaint an thehlut ta a. He Commission hian Lucky Byriani House chu Rs.55000/- zet a chawitir ta a ni. He Commission thutlukna hi Consumer Advocay Group whatsAapp atanga ka lak a ni.
Heti ang thil hotea kan lo ngaih thin ang chiah pawh hian hnam dang hi chuan complaint an theh lut ngam zel thin a ni. Chutih laiin keini erawh kan huai lova, kan diknaah pawh kan tlan chhe mai zel a nih hi! Ral hmaa zam ngai lo Mizo val rual leh lanute hian mahni dikna leh chanvo humhalh turin he vaipate thian dun ang hian sual kan do ve ngam ve ang em le?