𝐙𝐨𝐫𝐚𝐦 𝐊𝐨𝐡𝐡𝐫𝐚𝐧𝐚 𝐓𝐥𝐮𝐤𝐬𝐚𝐧𝐧𝐚 𝐭𝐡𝐥𝐞𝐧𝐭𝐢𝐫 𝐦𝐞̂𝐤𝐭𝐮

• Lalremliana Pachuau

(Tangka sum ngainat leh suma innghah rawngbawlna)

Kum a lo thar leh ta a, Zoram kohhran zawng zawng, kohhran hnuaia pâwl tepeng hrang hrangte chuan kumtluana rawngbawlna kawnga hma an lak dan tur rêlin, ţhutkhawmna an nei zo leh dim diam tawh a. Mahse, thil thar danglam engmah han hmuh tur a awm hauh si lo ang. Chu mi awmzia chu, kalphung nghet leh tihdan pangngai rengin Zoram kohhrante hi kum tina che chhuak ţhin kan ni tihna mai a ni.
Kum hmasa lama an Budget aia sang deuh hlekin ruahmanna an siam ang a. Engkim innghahna chu pawisa a ni leh tawp ang. Ţawngkamah erawh Thlarau Thianghlim kaihhruaina sawi lan a ni chamchi thung ang. Kumtluanin sum thawh chhuah dan tur rêlin kan hmanhlel ang a, chu kan thawh chhuah mil zel chuan rawngbawlna kan kalpui mawl leh tawp ang. Sum tel lovin rawng a bawl theih loh tih hi, kan ţhutkhawmna bangah ziakin tar lo mah ila, kan ţhutkhawmna thununtu ber a ni kum tin tawh a. Sum tel lovin eng ruahmanna mah kan siam ngam ta bawk hek lo.
“Chakna ni lovin, thiltihtheihna ni hek lovin, ka thlarau zawkin le” tih hi ringtute rawngbawlna kawng tinrenga kan innghahna bul ber tur a nih laiin, Zoram kohhrante erawh chuan he Pathian thu hi innghah nân a takin kan hmang ngam ngai lo. Suma innghahna leh sum kal tlanga ruahmanna kan duante reng reng hian huap chin a nei zel a. Chu mi pel chuan rawngbawlna engmah kan kalpui thei ta lova nih hi.
Chu taka chu Thlarau Thianghlim hian hnawk a ti satliah mai a ni lo, zalen taka a chet velna tur a dang ping tlat a. Chu suma innghah rawngbawlna chu, alh pawh a alh chhuak thei lo reng a ni. Mahse, kohhrante hmuh tur erawh chuan hlawhtling ang takin a lang lawi si ang. Thlarau mit aţang leh, thlarau tehna aţang erawh chuan rah chhuah lo, dân ang chauha rawngbawlna, kalphung nghet hnuaia rawngbawlna felfai leh tuihnai satliah ve mai a ni ta reng mai a nih hi.
Tichuan, he suma innghah rawngbawlna hian kohhranteah nghawng ţha lo tak a nei ta a. Kan kohhran leh pâwl bik thiltih a nih loh chuan, kan bul velah leh kan kiangah Thlarau Thianghlim hnathawh thleng mup mup reng mah se, tel ve tumna reng kan nei ta lo. Chu chu inkharkhip kum 2 chhûng hian hai rual loha hmuh theihin a rawn awm ta a nih kha. Kohhrante kan ro ngawih ngawih reng lai khân, thlarau ruai kil mup mup rengtute chanchin chhiar tur a awm bâng lo tlat.
Tunah hian kohhran mi leh sate tho rawngbawlna, Ministry hrang hrang kal tlangin kan ramah nasa taka chhem alhin a awm mêk reng a. Kohhran rawngbawlna ang lo takin, ruahmanna han siam lâwk ve ţhin mah se, an hun tiam leh an hun ruat chin zelah an rawngbawlna hmawr an bawk thei ngai lo. Thlarau Thianghlim uap rawngbawlna nihtir phalin, khunkhanna leh fekfawnnate an kiang a. Zalenna hnuaiah rawngbawlna nung êm êm a lo thleng ta ţhin a nih hi.
Mi tam tak chuan kohhran duhkhawp lohna leh sawiselnaah ka thu ziak hi an rawn ngai leh ngei dâwn a. Mahse, kohhran hi a nih tur ang tak ni se, taksa leh thlaraua dam lo leh natna veite damna hmunah lo chang tawh zawk se, kan ziah lan ţhin tawh anga, chhan sen loh leh dawnsawn sen loh natna veitute’n Pathian hman rawngbawltute an pan mawlh mawlhna lo rehin, kohhran leh a rawngbawltute lam hawi ngam tawh rawh se tiin, kohhran tân ţhanhnemngai takin kan tlângau a ni zawk tih hria ila a va duhawm dâwn êm!
Mahse, kan baibul ngeiin hun hnuhnung chanchin min lo hrilh lâwk diam tawh chu, lo thleng ngei tur a ni si. Nikum kum laihawl vel aţanga Lungleia rawngbawlna rawn nei, Zothansanga hman ni deuh lâwk thlengin Lunglei a chamchilh a, a haw hlei thei lo. Chutiang bawkin Dr Dennis-a, Ruatfela, Frederick-a etc te pawhin ruamhmanna fel tak hnuaia rawngbawlna an neihte chu, tun thleng hian a la ti tawp hlei thei lova nih hi.
Heng rawngbawltute innghahna chu, “Ka thlarau zawkin le” tih a nih miau avangin, mihring tum dan leh ruahmanna angin engmah a thleng thei lo. Thlarau hruaia awmin, thlarau duh dan zelin rawngbawlna nung leh thil tithei, rah chhuah mawlh mawlh bawk an nei mêk reng a nih zawk hi. Zoram kohhrante erawh chu sumin min phalsak chin leh, sumin min ruahmansak chin bakin rawng reng kan bawl thei tawh lo a ni ber.
Chuvang tak chuan kan ramah thlarau dam lo an pung tulh tulh reng a nih hi. Kohhran leh a rawngbawltute duhkhawp lo mi chu, chuti khati tih hi heng thu ziaka sawi ţhinte beih nân taka kan hman a ni. Mahse, ngun taka thil chhui mi chuan, kan tun hun hman mêk dan hi Lal Isua lo kal laia Jerusalem leh a chhehvel, Israel fate nun dan nen khân a inang êm êm tih an hre thei ang. Lal Isua pawh khân tu dang a rawn sawisel lo. Kohhran leh kohhran puipate leh an rawngbawl dan hlir a nih kha a rawn sawisel zawk ni.
Kan baibul chuan ni hnuhnungah tluksanna, pen bona, thutak hawisana thawnthu lawi lo mai mai lama mite an pen bo dan tur chiang takin a lo sawi lâwk tawh a. Heng hrilh lâwknate hi ring lo mite chunga thleng tur a ni lo a. Ringtute leh Pathian kohhrante chunga thil thleng tur an ni zawk tih kan hriat chian a va hun tawh tak êm! Tangka suma innghahna leh, tangka sum hruaia rawngbawlna hi thlauhthlâk ngam a, thlarau hruai rawngbawlna lama ke kan pen ngam a hun ta takzet a lo ni e.