Dan pangngaia school kal a ni leh tur hi a lawmawm
School Education Minister hoa education deptt officer leh zirtirtu pawl hrang hrang thukhawmte chuan April ni 5 atang hian zirna in zawng zawng dan pangngaia hawn leh nise an ti a, hri leng vanga season hnih chhung ngawt school luh a theih tak loh avangin tuna ruahmanna lo awm leh pawh hi a phurawm tawh hle.
Hri lengin nasa takin min nuai a, naupangin nunphung nghet an nei thei lo a, an zirnain a tuar bawk a, tan tak takna thinlung an nei pha lo hle bawk. An zirna an hlamchhiah telh telh niin a hriat chhoh a, online-in class kalpui tur tih nimahse, naupang leh zirtirtu tam zawk hi chuan online hi hun khawhral nan mai mai an hmang nasa hle. Thiam tumna rilru pu an awm lo a, thiamna pek tum an awm lem lo nual bawk.
Kan zirna kalphung a chhe chho telh telh nia a lan laia school lut leh tura thutlukna awm ta hi a lawmawm a, chutihrual erawh chuan hri leng a la reh miau loh avangin hri leng laka himna tur dan hrang hrang khauh taka zam sa erawh a tha khawp mai.
Naupangte phei chu thu hle hle thei lo, thiante nena insi chat reng an la ni zawk bawk nen hian, a invenna lam, him tura inzirtirna leh inkaihhruaina lam hi kan uluk a, dan khauh deuh kan siam sa loh chuan school luh tan ni atangin rik hut kan rual leh nghal ang tih a hlauhawm a, zirtirtute pawh mahni thawhna hmunah theuh dan khauh deuh hleka kengkawh tura hrilh mawlh mawlh an tul awm e.