- Judith Lalramliani, Govt. Hrangbana College
Mihring kan nih chhung chuan kan nundan leh chetzia hi midangte hian min thlirin min chik reng mai a;chutiang bawkin keini pawh hian kan chik em em reng. Mi chanchhiat emaw leh tihsual an neihte hi hriat loh leh hmaih palh hlau em em hian kan lo chang thup mai si a, ‘Hringnun’ a ni miau si a tin ni.
Thenkhatin damkhawchhuah nan a sur a sa hnuaiah,dam loh leh nawm loh pawh sawi lo in hna kan thawk chung pawh in eikhawp tawk tawk chuangliam pawh em em pawh awm hlei thei lovin kan bei a. Thenkhat erawh chuan dik lo takin Pathian duhdan tih pawh hre reng mahse kan pamham leh duham thatchhiat luat avangin mahni ta tur pawh ni lo chanhai leh rethei zawk te chanpual pawh kan hui in kan laksak duh mai zel bawk a. Khawvel hi a tenawm a, \awp tawh kan ti kan ti a, mahse khawvel \awp hi zawng amah mai hi chuan a tawp lo, a chhunga chengten kan suasam dan avang hian a tawp em em mai tawh a ni. Mihring kan lo piangchhuak a naupanzual lai chuan engmah a chhia leh a tha kan hrethiam lo a, kan awm mawl tawp tawp a, kan duh ngen in kan tap a, neih ngei tumin kan nuar thin bawk a. Mahse hun a kal a, tleirawl kan nih chhoh meuh chuan a dang ta, chhia leh tha kan thliar hrang thiam tawh a, kan duh nei turin kan nuar in kan tap ngam tawh lo; zah nachang kan hre tawh tlat a ni. Ni e, heng hunlai atang hian a ni ‘Hringnun’ hi a harsat chhoh a, hrehawmna leh buaina, manganna te kan tawh tan thin ni. Mahni duhdanin kan nung hlei thei tawh lo a, midangte min sawi dan tur te kan ngaihtuah chho ve tan a. Hringnun hi a harsa ani. Engvanginnge Pathian hian he khawvelah hian min lo piantir ve ti a mahni inngaihtuah a van lam hawi a tawngtaia, mittui tla zawih zawih chunga zawhna zawh chang hi kei ngei pawh hian ka va ngah teh lul em. Duhthlanna ka siam sual avang hian ka inchhirna hian hrehawmna, tawrhna, manganna leh zahna ka nei thin a. Dam ve reng châk lohna leh dam hlutna hre lo khawpa beidawng nun hi a neih theih lutuk a, mahni a awma han inngaihtuah ngut ngut phei chuan Siamtu Pathian ngei pawh dem leh ngawt chang hi a tam a. Tleirawl/ Rawlthar chho han nih hian thenkhatte chuan mahni nun ngei pawh hlut zo lo leh hlutna hre tawh lo, awm ve leh dam ve reng pawh awmzia awm lo in an la ta mai a.Tawrh leh hrehawm a awm reng peih tawh loh avangin an nunna chu kawng hrang hrang in an la ta mai reng a ni. Harsatna kan tawh hrang hrang hi nu leh pa, thiante hnena thlen vek rem lo a awm a, mahni a tuar mai leh mahni a thinlunga pai mai chi te an awm thin. Chu chuan sual lamah min hruailuta, engmah hre lo a awm daih duh vang in ruihhlo ah kan tlan phah a. Ruihhlo hi kan duh leh kan lawm em em avanga ti ni lovin, ruihhlo in engmah hre lo a min siam hun rei lote pawh kha kan thlakhlelh vang a ni thin a ni. Thawveng takin khawvel kan hmachhawn ve theih hunlai rei lote kha kan thlahlel ve em em mai thin a ni. Mahse chung ruihhlo leh ruihhlo ti chu khawtlang, kohhran leh ram duh loh thil al o ni leh zel a.Midang lah hian kan nundan min hmuhpui leh min hriatpui hauh si lovin kan nihna bak baka min sawiin, demna tinreng in min chirhtheh zui leh thin bawk a. Ruihhlo ka sawi mawina thil a ni lo, mahse, kan hriatchian leh kan hmuhpui a nih lem loh chuan sawi belh lo ila, kan hriat leh kan hmuh chin sawi mai ila, thu neih belh vak vak lo hian. Mihring mizia leh hawiher a in an loh ang bawk hian kan harsatna hmachhawn duh dan a inang vek kher lo a ni. Pathianah hian piantharna leh lawmna kan hmuh dik chuan thil tha lo hi tih leh khawih a ngai reng reng lo a; mahse Pathian zawng chung pawh hian Pathian hi kan hmu mai thin lo leh bawk a.
Hringnun hian thil tam tak min zirtirin thil tam tak min hmachhawn tir a. Kawng harsa leh hrehawm min tawhtir chang awm mahse hlimna leh lawmna min thlen hun a awm leh bawk thin. Hun hi a ding reng lo a, a kal ve reng ang hian kan hun tawn a dang ve reng bawk a. Pawimawh ber chu keimahni leh Pathian inkar a that leh that loh hi a ni. Kan nuna kan seng leh lakluh, kan pek chhuah leh kan thlir dan her rem thiam hi a pawimawh a;c hutin he khawvel awmchhung leh hun hian kal zai a rel chhung chuan he ‘Hringnun’ hian tel zai relin a awm reng dawn a ni.