AIZAWL: Mizoram State Level Bankers Committee (SLBC) chu nimin khan biak hmuh theihna kaltlangin an thukhawm a, Mizoram puma bank te loan pek chhuah zat credit deposit a pun thu tarlan a ni.
Thutkhawm kaihruaitu, SLBC Chairman, Chief Secretary Dr Renu Sharma chuan, Mizoram puma bank te loan pek chhuah zat credit deposit ratio zaa 53 a nih thu sawiin, quarter hmasa aiin CD ratio-ah hmasawnna a awm thu a sawi a; hetihrual hian Private Sector Bank pali te CD ratio zaa 20 aia tlem a la ni erawh hmasawnna neih a tul thu a sawi.
Dr Renu Sharma chuan, sumdawnna lama loan pek chhuah lamah pawh hmasawnna a awm tha hle tih a sawi rualin Private sector bank thenkhat Sumdawnna loan tun quarter a pe chhuaklo te chu he lam hawia loan pe chhuak turin a chah.
Sorkar laipuiin mipui te tana Social Security Scheme a siam chu hmang tangkaina chang hriat a tul a tih thu sawiin, sorkar laipuiin kumin September, 2022-ah mi zawng zawngin Social Security an neih theihna tura hma a laknaah tan lakpui turin Mizorama Bank te a chah a ni.
SLBC chairman chuan, sorkar loan sponsored chi hrang hrang PMEGP, Self Help Groupte, NULM leh NRLM ang chi te pe chhuak uar tur leh tun aia tam loan pe chhuak turin bank zawng zawng te a chah bawk.
Thutkhawmah an tarlan danin, Mizoramah bank chi hrang hrang 24 awmin, heng bank te hian branch 226 an an nei a; Private sector bank branch 31, Regional Rural bank branch 96 leh Co-operative bank branch 22 te a ni.
Sorkar kum kal lai mek 2021-22 December 2021 quarter chhungin banka pawisa dah luh cheng vaibelchhe 13,844.27 leh advances vaibelchhe 7384.84) a awm a, bank te loan pek chhuah zat credit deposit ratio chu zaa 53.34 a ni.