Russia rama social media influencer te chaw bel a pawp ta a, follower maktaduai tam neite mittui a hul thei lova, an ram sorkarin Instagram hman a khap tâk vangin mittui nen hun an hmang mek.
Sorkar hmalakna thar avang hian instagram user maktaduai 80 velzet te khawvel a thim nghal rup a, ramdang nena inzawmna leh inpawhna zawng zawng tihtawp nghal vek a ni.
Photo-sharing app lar takah hian social media influencer te’n sorkar-in a khap bur hmâ Ni chiah khan mittui nen thlahna thuchah hnu-hnung an sawi hlawm. Russian reality TV star Olga Buzova chuan video a siamah instagram khap a nih dawn vanga rlru na taka a awm thu te, a nun pumpui chu laksak vek ni hiala a inhriatthu a sawi chhuak.
|ap lo thei lo
“Zep thu a cheng lova, follower pakhat hloh mai pawh hi ka tan chuan hlauthawnna nasa tak a ni thei hial. Hmalam hun sawi theih a ni lova, engmah ka hre ngam tawh lo. Ka nun, ka hna leh ka rilru zawng zawngte ka ‘share’ thin che u a, tunah chuan ka thinlung leh ka nun pumpui hi laksak vekah ka inngai ta,” tiin follower maktaduai 23.3 neitu hian \ap zawih zawih chung-in a sawi.
Video dang lehah chuan Twitter lama lar tak pakhat pawhin, mittui nen, “Ka tan chuan nunna a ni a, ka thlarau zawng zawng nena ka hmangaih a ni a sin,” tiin instagram a hman theih tawh dawn loh vanga a rilrunat thu a sawi ve a ni.
A mak e ma!
Hetih lai hian, an mahni larna, sum lakluhna leh nawmsakna hloh tâk vanga mittui nena \ap pur mai te chu hrethiam lova, Ukraine mi sang tam tak thih leh dam karah leng mekte ngaihsak der si lova, lem changkual vela puh a, nasa taka demtu pawh an tam.
Russia-in Ukraine a run hnu ah mi sang chuang an thi tawh a, heng mite tana lungngai pawh ni lova, an mahni lam ringawt ngaihtuah a, an khawsa vel ei lo an kât nuk mai.
Buzova post hnuaia comment pakhatah, “Lalpa, Ukraine-ah mi an thi zawih zawih a, lei hnuaiah hlau leh khur chungin naupang pawisawi lote an tawm mek a, mutna mumal a awm lova, an neih zawng zawng an chán laia instagram vanga in lo \ap vel hi a awm-ang lo e mai,” tiin a ziak.