Khelmual pawn lamah Chelsea in harsatna an tawng hnem chungin khelmual chhungah erawh dan theih an ni lova. European champion ni lai hian Lille lakah hnehna changin 4-1 aggregate in UEFA Champions League quarter-final an lut.
Blues hi first leg-ah 2-0 in an mualah an chak tawh a, hei vang hian dinhmun \ha taka ding chungin inkhel an hmachhawn. Nimahsela an club in harsatna a hmachhawn hrang hrang avangin an boruak a zangkhai lova, inkhel turin France an pan dan tur thlengin chiang lo a awm nasa hman.
Stade Pierre-Mauroy-ah erawh chak turin harsatna lian an tawk lova, tun season a an tih fo angin bul \an \ha zawkah \ang lo mahse an tlo na an lantir a, an khingpuite 2-1 in an chhanglet.
Lille tan striker rinrawl Burak Yilmaz chuan minute 38-naah goal hmahruai a khung a. Chelsea midfielder Jorginho handball avangin penalty a\angin goal a khung.
Hei hi halftime dawnah American forward Christian Pulisc chuan a sut a. Second half-ah Chelsea captain Cesar Azpilicueta chuan minute 19 khelh hmabak a la awmin inkhel a dah\ha a, an chakna goal a khung.
Harsatna karah Blues
Chelsea hi club neitu Roman Abramovich leh Russian sorkar inhnaih avangin Abramovich an hrekna kawnga tuartu zingah an tel a. Club neitu thar hnenah Russian mi hausa chuan hralh a tum thu a lo sawi tawh.
Tunhnaiah Chelsea lei tum ni a sawi an tam a, Liverpool chairman hlui Sir Martin Broughton leh Lord Coe te intelkhawm chu lei tum zinga sawilan an ni a. Anni bakah club striker hlui Gianluca Vialli leh Nick Candy te
an thawkdun dawn niin sawi a awm a. Major League Baseball team Chicago Cubs neitu Ricketts chhungkua pawh sawirik an ni bawk.
Nilaini zan inkhelah erawh khelmual pawn lama bengchheng awmten an inkhel a nghawng lem lo. Lille in tha za takin Chelsea hmachhawnin an tlan taima a. Mahse Premier League team in player an neih \hat zawk a lang leh \hin.
Goal an chhuah hmasak hnuah Chelsea in an mamawh hunah tak theihna sang an neih an lantir a, dinhmun derthawng a ding lo turin ball an thunun bawk.
A handball avangin penalty chawi mahse Jorginho chu Chelsea inkhelah a pawimawh a, Pulisic-a goal khung tur siamsaktu a ni a. Second half-ah Xeka chuan Lille goal hnihna khung teuhin goal ban pet per mahse Blues captain in goal a khung hnuah inkhel dah\hat a ni tawh.
“Tuma tum duh loh nih ka duh”
Chelsea boss Thomas Tuchel chuan quarter-final ah team \ha rual kiangah inel dawn mahse an huphurh loh thu a sawi a. “Tuma tum duh loh team nih ka duh a, a sang pariat zingah hian hetiang team hi kan ni dawnin ka hria.”
“Chak tura rin ni lo zawk chunga hnehna chan fo hi a harsa a, mahse khawvela league hautak berah top four a tlin tumin kan bei mek a, Europe-ah pawh a sang pariat zingah kan tel. Rinkai nih loh hian kan theihna sang a phawk chhuak \hin.” a ti.