- PL Liandinga
August ni 21, 2018 chhuak Zozam Times Headline kha vawiin chu i ngaihtuah thar leh teh ang u. Headline thupuiah khan, “Kan sorkar hunah chuan vai buhfai kan ring tawh lo ang : Zoramthanga” tiin dah a ni a. Hetiang hian a headline thupui hnuaiah chuan ziah chhunzawm a ni :
“MNF president Zoramthanga chuan nimin khan Mizo hnam runah mi thar lawmlutin thu a sawi a. MNF-ibn sorkarna a siam hunah chuan Mizoram chu chaw a intodelh tirin vai buhfai rin a tul tawh loh tur thu a sawi.
“Mipui hi sorkar pawisa ringawta awmtir tawh loh kan tum,” a ti a. “Chawa intodelh theihna ram zawl chin hectare 70,000 chuang kan nei a Chhungkaw 3000-4000 inkarin khawl nena leilet an enkawl chuan Mizoram hi min chawm zo vek,” a ti.
“Chawa intodelh a sawifiahnaah chuan – buh, thlai, hriak, sa leh sangha a huam. Delhi-a pawisa hman sen loh khu kan hailut chur chur ang. Chumi hunah chuan contract leh sorkar hna inchuh hi a bo tawh ang a, corruption leh congress chu an tawmim tawlh tawlh ang.
“Aizawlah hian kawng chhawng mumal leh tha tak siamin, Aizawl khawpui hi parking-na leh traffic jam harsatna awm tawh lova siam kan tum a ni,” a ti.
“Zorama chuan : Congress chuan an MLA 34-te NLUP dawng tur an thlantir a, opposition MLA 6 te chu an hnawl a, hei a dik lo tiin high court-a kal an awm a. Court chuan kar 4 chhung a stay ta a. Hemi chhunga lo semtu leh lo dawngtu chu lungin tan theih a ni, a ti.”
Khiti chin khi Pu Zorama thusawi, Zozam Times-in August ni 21, 2018 a a chhuah chu a tawngkam ang angin lak chhuah a ni a.
Hemi bakah hian Assam Rifle hmun changchang sawiin an sorkar chuan an nawr chhuak nghal ang a, helai hmun hi chhawng hnih thuma dawhin a chungah grass mawi tak phahin thalaite intawllenna hmun nuam leh tha tak siam a nih tur thu pawh a sawi a ni.
Heng thu hi kan hriat sa leh kan Chief Minister-in a sawi ngei a ni a. Zozam Times chanchinbu sawi tel kher lo pawh hian mi tam takin heng thu, kan Chief Minister-in a sawi hi kan hre awm e. Chawa kan intodelh leh intodelh loh chu kan hria ang a. Kan ram leileh theih hectare 70,000 atang khan hectare engzat nge buh thar theih nana kan cheibawl tawh hriat a chakawm khawp mai. Pakla hisapin han ti ila, Ministry term khat chhung hi kum nga a nih chuan tunah a kum lina an hmang mek a, hectare 70,000 atang chuan hectare 56,000 vel chu a chhe berah buh a kan intodelh theihna tur atana siam awm tak a ni. Mahse chutih laiin kan vai buhfai lakluh pawh a tlahniam awm pawhin kan hre lova. Vai buh hi kan la mamawh viau mai a, vai buhfai kan lakluh chu tlem a hnekin tunah kan MP te chuan vai buhfai tam zawk ngen chhuah an tum mek tih thu chanchinbu lam atangin kan lo hmu leh a.
Pu Zoramthanga thusawi khan, “Kan sorkar hun chhung a zawh meuh chuan….” ti lovin, “Kan sorkar hunah chuan…..” a ti kha a ni a. An sorkar kum li-naah chuan a thusawi hi a thleng dik deuh vek a nih loh pawhin a kum nga-naa thleng dik turah te pawh lo ngai ila. Chuti a nih chuan tunah hian kawng chhawng te pawh hi engemawchen chu a hmel hmuh tur awm tawh awm tak a ni. Parking chungchangah PAHOSS hmangin hma lak a ni a. Kan han hriat chian meuh chuan mimal, man chawia motor dah theihna siamtu tur te hnenah puk pawh ni lo, rulh let leh ngai lo turin pawisa fai an lo pe tawp tawp mai a. Chung mite chuan motor dahna siam nan sorkar pawisa pek chu an hmang ang a, motor dahtute hnen atangin motor dah man chu an duhtawk tawk an chhiar thei lawi si dawn a lo ni reng mai a. A chang fuh vek vek tan chuan kan sorkar hi chu a va han vanneihthlak em. A buaithlak lai tak pakhat ni ta chu motor dahnaa kan buaina hmun, khawpui lun laiah ni lovin mi leh sa kan neihna hmun remchang lai ni awm tak takah he PAHOSS hi kalpui a ni ta tlat hi a ni. Saiawna te puan pawp bel ang maiin, ‘A inring vei khawr khawr a, a pawp lo lai ka bel hlauh asin le,’ tih te pawh kha kan ang deuh rohin a lang. Pitarte tlangah te, Zemabawk Lungbial vengah te a chang tam tamin an la ta mai si a.
NLUP dawng tur thlan chungchangah Opposition MLA paruk kha thlauhthlak an nih a, Court-in a stay chuan SEDP hmu tur thlangtu atana Unit, a lang a changin MNF Unit hman hi Court-in engtinnge a ngaih ang? Chu chauh ni lovin Mizoram Chief Minister-in MNF mi leh sa lo chu thlang lo tura Unit te a chah kha eng angin nge Court-in a ngaih ang?
Zozam Times chanchinbu hi a lo tangkai hle mai — Chief Minister-in August ni 21, 2018 a a thusawi te kan hriat leh theih phah a.