Russia-in Ukraine a run hnu-ah a tum leh beisei angin hnehna a chang mai si lo, Ukraine mipuite’n thih tha nena an lo beih tâkah chuan Russia sipate pawhin hma an sawn vut vut thei bik lo. US leh khawthlang ramte’n an lo pui ve reng bawn nen! President Putin mangang, thin thawk thut chuan Nuclear ralthuam enkawltu bik a sipaite chu inralring turin thu a pe ta mai kha a ni a, khawvelin indopui pathumna a hmachhawn mai dawn ta nia ngai a, hlauthawng taka awm te pawh an awm. Engpawhnise, heti anga indopui pathumna thlen hlauhthawnna hi tunhma lam khan a lo awm zauh zauh tawh a, vanneihthlak takin a tlawlh leh thin. Tun tumah hian zaithiam lar tak James Blunt-a’n indopui pathumna thleng mai thei tur ata khawvel a chhanchhuah dan i chhiar dawn e.
Rimawi khawvela ‘You’re Beautiful’ hla avanga hriatlar, James Blunt chuan sipaia a \an lai khan indopui pathumna a chhuah lohnana lo dangtu a ni ve tlat mai leh.
Engtin chiah maw?
He mi chungchang hi hman deuh khan BBC Radio 5 a hrilh a, rimawi a luhchilh hmâa, rambuai tak, Kosovo-ah NATO sipai officer a nih lai khan indo thlawhna khalh sipai ho a hruai laiin Russian sipai hovin an lak, Thlawhna \umhmun chu la let leh tura US General Wesley Clark-a thupek a zawm lo lui niin a sawi.
Blunt chuan, “Ge-neral hnen atanga thu lo kalah hian an lak tawh, va lak let tur a ni a, \awngkam danglam tak tak hman a ni a, kan hrethiam kher lovang. Amaherawhchu chiang em em maia radio kaltlanga kan hriat chu, ‘Nuai chhiat’ vek tur tih a ni,” a ti. He thupek hi a zawm loh bakah, u luk takin a zirchiang a, kalpui chi a ni lo a tih chu British General Mike Jackson chuan a thlawp nghal bawk.
“Russian sipai te beih ka tum loh laiin, Gen. Mike Jackson hnen atangin, “Indopui pathumna lo chhuahnaah ka sipaite hi mawh ka phurh tir duh lo” tih thuthawn ka ngaithla hman chiah a. An mahni va beih aiin, airfield hi hual zawk mai ila, ka ti a. A hnu rei vak lovah Russian sipaite hi ei leh in tur an neih tawh loh avangin an awmna hmunah kan awmchilh ta a ni,” a ti.
Hetianga hotute lawk ber atanga thuchhuak a zawm loh chungchangah thubuai (court martial) thleng pawh a inhuam thu sawiin, Blunt chuan, “Thil dik leh tha ni i hriatte i tih hun a awm a. “Thil dik lo leh tha lo nia i hriatchian em em mai vanga din ngheh tlat a \ul changte pawh a awm ang.
“Chu taka chu, British sipai kan nihna atanga kan tih tur pawimawh ber niin ka hria,” tiin a sawi.