Serchhip bialtu MLA Lalduhoma’n a bial chhunga YMA, Buangpui branch te hnenah Lawngleng pahnih a pe a. YMA, Thenzawl Vengthar branch te hnenah Futsal ball 3 leh goal net 2 a pe bawk.
Lalduhoma chuan, “Buangpui ram chhungah hmun mawi leh hmingthang tak tak, mipui pawhin an hlut em em Tuirihiau leh Vantawngkhawhthla kan nei hi kan vannei” a ti a. Lui dung mar tha tak, nakin zelah pawh water sport atan te pawha hmantlak khawpa chei tham an nei nia sawiin, khawtlang leh YMA hruaitu ten luidung leh a chhehvel te tha taka an lo humhalh avanga lawmawm a tih thu a sawi.
Helai hmun hi sorkar laipuiin a hriatpui tawh tih sawiin, Lalduhoma chuan “Ministry of Tourism-in project lian tak, Vantawng Project an rawn siam dawn a, helai hmun hian mipui tam zawk a hip theihna turin kan chei dawn a ni” a ti bawk.