ZPM party-a Zonu hruaitute pual political training thawhkhatna nimina neiha resource person ZPM party general secretary B. Lalchhanzova’n ZPM chu sorkar turin a inbuatsaih mek niin a sawi.
Sorkar tura ZPM party inbuatsaihnaah Zonu te an pawimawh hle tih B Lalchhanzova chuan a sawi a. Veng/khua tam takah ZPM Zonu an din tawh thu sawiin, ZPM awmna apianga Zonu din zel turin Mizo hmeichhite a sawm.
B Lalchhanzova chuan ZPM a sorkar hunah pawh mumal taka an inrelbawl theihna turin Zonu te chu an intuaihriam sauh sauh a pawimawh tih a sawi a. An chet velna apianga mipui beidawng mekte thlamuantu ni zel turin a chah bawk.
Resource person pakhat zawk ZPM Genereal secretary Phairothanga pawhin, Assembly session- an MLA te chet danah an lungawi thu sawiin, “An chet dan atangin ZPM-in ram a hruai dan tur mitthlaah a lang thei” a ti.
Phairothanga chuan rorel lai chungchang sawiin, state disaster management authority (SDMA) chairman chu hripui hluar laia biru tlata, hri ziaawm veleha inlar leh ah a puh a. “Chief minister Delhi zin haw tuk lawka minister pakhat liamthla ve nghal te, kum 2023-a South Tuipui biala rorellai ticket-a ding tur an inrinsiak ta te hi thil mak, mipuiin a ngaihna kan hriatloh te an ni,” a ti.
ZPM danglamna thenkhat sawiin, Phairothanga chuan thuneihna insemzai chu Mizorama party dangte neih ve ngamloh, ram changkang, hmasawn zawkte kalphung a nih thu a sawi a. Congress party tlakniam zel thu sawiin, “Tunhma Mizoram Congress chu engemaw bawm mai tihna a lo ni a, Central lama zawmpui neih that zia sawi thin tute leh President thar thusawi a inkalh ta hle” tiin, “Kum 10 chhunga Sem policy buaipuitute ngeiin a thatloh zia an sawi hi keini engmah la sem ve lo ten kan sawi aimahin a awihawm leh zual a, a sema sem thintute ngeiin an rawn sawi ve ta hian ZPM kalphung leh thil tumte a thatzia a rawn nemnghet nawn leh a ni,” a ti bawk.
ZPM Zonu political training hi an president Sangzuali’n kaihruaiin sawihona hun te an hmang bawk a ni.