Nimin khan Durtlang Mualveng-a workshop pakhata electronic detonator ni ngeia hriat a puak a, mi pathum an thi a; mi pakhatin hliam na tak a tuar.
Police hotuten The Zozam Times an hrilh danin, zing 8:30 leh dar 9 inkar bawr vel khan Buanga Workshop-ah hian puak thei thil a puak a, he vanduaina thlengah hian workshop neitu, Lalhmangaihzuala (Buanga) (29) s/o Lalngilneia, Durtlang North leh a mi chhawr, Lal\hafamkima (48), Sakawrdai chu a hmunah hian an thi nghal.
Chhiatna a thlen laia Pick up siamtira awm mek, Immanuel Lalmawikima s/o Henry Lalrotluanga, Sakawrdai leh Thangsohrai, Damparengpui te chuan hliam na tak an tuar a, Synod Hospital, Durtlang panpui nghal an ni a, Immanuel Lalmawikima zawk hi damdawi in thlenpui a nih hnuah a thi ve leh a; he thu buatsaih lai thleng hian Thangsohrai hi hliam na tak tuarin ICU-ah enkawl mek a ni.
Workshop-a thil puak hi a tirah chuan welding-na gas nia ngaih a ni a, hetihlai hian enfiah a nih hnuah electronic detonator a ni tih finfiah a nih thu DIG (Headquarter) Lalbiakthanga Khiangte chuan The Zozam Times a hrilh.
Lalbiakthanga Khiangte chuan, “Forensic science laboratory (FSL)-a expert-ten an han enfiah a, a puak nawi vel an chhar a\angin electronic detonator Pentaerythritol tetranitrate (PETN) a ni tih kan hre ta,” a ti a, Mizorama electronic detonator puak hi an vawi khat tawnna a nih thu a sawi.
Electronic detonator hi workshop-a an siam mek pick up chhunga awm a nih thu Lalbiakthanga Khiangte chuan sawiin, “Engtia lo kal nge, dan phala kawl nge an nih tihte hi kan chhui zui nghal,” a ti.
Durtlang Branch YMA hruaitute chuan, workshop-a Electronic detonator puak hian a chhehvel metre 100 vel chu a ngawr na hle tih THE ZOZAM TIMES an hrilh a, in 13 vel a nghawng tih leh workshop bul hnai chiaha in awm Lalnunmawii in phei chu an in bang tile a chhe vek a, riah chhuahsan ngai hial khawpin a awm tih an sawi.
In 13 zinga a tam zawk chu an darthlalang te a keh deuh nual a, Ceiling te, kawngkapui te, tukverh leh tuizem te pawh a chhe nasa hle niin YMA hruaitute chuan an sawi.
Durtlang Mualvenga chhiatna thlenna hmun hi Minister R.Lalzirliana, Bialtu MLA Vanlalhlana leh Aizawl Mayor Lalrinenga Sailo ten an tlawh nghal a, bialtu MLA leh Aizawl Mayor te hian tanpuina hna thawk a, tlawmngai a hnatlangte tanpui nan khawtlang hruaitute hnenah Rs 5000 ve ve an hlan a ni.