Social media hman dan thiam a hun tawh hle
Khawvel a changkang zel a, media in nasa takin min run a, min luhchhuah a, dan zam sa tha tak tak kan neih thlengin kan hre lo a, in man theih a ni tih lah hre lo kan la awm nual niin a lang bawk. Kan fimkhur chhoh erawh a ngai khawp mai.
Social media in heti tak maia min run hnu phei hi chuan mahni khum laizawl atang leh mahni inchhung lum atangin kan duh duh kan sawi a, min pawi kan sawi ang, tih ngaihtuah miah lovin kan tal bian bian a, fimkhur erawh kan ngai sauh tih hriat thar a tha hle.
Tun hnaiah pawh thu thehdarh dik tawk lo avangin police chhui ngai an awm ta zauh zauh mai. Man hial an awm chho ta nawk a, social media kan hman hian fimkhur a ngai hle. Kan duh duh kan sawi theihna hmun a nih rual hian thudik tawk lo thehdarh lo tura kan fimkhur thiam ve erawh a tul a, kan thusawi leh post apiang dik ber thawka kan thawk nghal zel chuan kan hmalam hun hi a eng lo hle a ni ang.
Social media hi khawih a nuam a, awm hmunah duh thalin kan hmang thei bawk. Chutihrual erawh chuan thudik leh rintlak neih leh hriat kawngah erawh print media leh visual media te hi a rintlak pawl an la ni reng tih kan hriat thar a, social media hman dan chintawk kan hriat thar a tha.
Kan buai lohna tura kan buai fo loh nan chin tawk neiin khawih zir ila, patlinga pumpa nileng zankhua maia social media khawih nuam ti em em mai nihte hi zahah lak a hun viau.