- Mahmuaka Chhakchhuak
Ziaktu pakhat chuan ‘Kelkang thlarau phuahchawp khan lemchanna dawhsan sang zawkah min hlangkai a, lemchan nun thuk zawkah min hnuklut lek fang a ni. Phuahchawp ni lo, thlarau dik chu ni sela chuan, khati zatin an han chhim hnu kha chuan Mizoram mipui nun hi a tha zawnga inthlakthleng hlawk thei tur a ni asin. Mahse, chulam chu kan hawi phah der si lo’ a ti a. A ni viau mai a, kan mizo thlarau chan dan hi a hut hut leh sahawk zawng chauh hian kan chang ta thin em ni tih tur hi a ni. Khati taka Kelkang thlarau kan han chang nasa ta mai kha tunhnuah hian sawiho leh pawh chakawm loh tur khawpin a rah hmuh tur kan hre tlem a nih si hi. Taksa damna atan sawntlung lei kan ei a, mihring engemawzat leng khawpin kan hreuhkaw hial a nih kha. A vanglai phei chuan Mizoram khaw hrang hrang atangin lirthei hmangin kan pan khawm a, Aizawl City Bus ngei pawh thawl hawk khawpin Kelkang lama kalna atan kan hmang nasa a, nimahsela mipui nunah hian a tha zawngin a thawk chiah lo nge ni hei Kelkang thlarau chang leh chang lote kan in ang leh reng tho mai.
Piantharna hi peih leh peih loh lam zawnga chhiar tur a ni ngai lo a, Chanchintha Johana Bung thum chhunga Lal Isua leh Nikodema inbiakna chungchangah khan a lang chiang viau mai. Nikodema hnena Lal Isuan ‘I Piangthar tur a ni’ a tih hi tawng bul zawk – greek tawng lamah chuan ‘Ean me tis genethe Anothen’ tih a ni a, ‘Anothen’ tih hi ‘Ano’ tih atanga lo kal niin ‘upward, on the top, above, brim, high, up’ tihna te a ni a, if not anyone be born from above tiin English lamah chuan an dah bawk a ni. A awmzia chu ‘Mi tupawh chunglam atanga a pianthar loh chuan…’ tihna a ni. Tisa hrin mah ni ila chunglam atanga hrin nawn leh ngai kan ni tihna a nih chu. Isua leh Nikodema inbiaknaah khan chiang takin kan hria a, Isua khan fiah takin a hrilh a, nimahsela Nikodema erawh chuan tunlai mizo kristian tam takte ang maiin beng chauhin a hre thung a.
Isua chuan ‘Tih tak meuhin, tih tak meuhin ka hrilh a che, mi tupawh an pianthar loh chuan Pathian ram an hmu thei lo ang‘ a ti a, helaia Isua’n piantharna thu a sawi hi ‘Chunglam Pianna‘ a ni a, KJV chuan ‘piang nawn’ a ti a, WEB chuan ‘piangthar‘ a ti a. WEB hian footnote-ah ziah chhunzawm bawkin Joh.3;7 thua ‘anothen’ tih nen hian a awmzia chu ‘piangnawn’ tih leh ‘chunglam atanga chhuak’ tihna ve ve a ni a ti. The Living Bible pawhin ‘piang nawn‘ a ti bawk a, ARV leh ERV te pawhin ‘piang nawn‘ an ti vek tho mai. Tichuan helaia Isua’n Piantharna thu a sawi hi tisa pianna mai a ni lo a, Pian nawnna tihna a ni a, chu chu tawngbul zawk Greek tawng lamah chuan ‘anothen’ tih a ni a, chumi awmzia chu ‘Chunglam atanga piang, Pathian hrin’ tihna a ni. Helai thu chiah hi ‘anothen’ hmanna a ni a, I Pet. 1;3 thu a ‘hring leh’ tih chu I Pet. 1;23 ah chuan ‘piangthar’ tih a ni a, Greek tawnga ‘anagennon’ tih ve ve a ni.
Mizo tawng ai chuan Sap tawng lamah hian a chiang zawk deuh anga, Sap tawng Bible lama ‘Piangthar ‘ an sawi dan hrang hrang te chu;
Reborn; OEB,etc
Second birth; BBE, etc
Born a new; Darby, Tyndale, WEB, WEBBE, WEBME, HNV, Murduck, RV, ERV,
Ampflied (born a new; from above), Coverdale, etc
From above; LEB, NETFree, ASV, Rotherham, TS1998, Godbey, YLT, ACV, ISV,
EBR, Massage, EBR, CEV, NRSV, etc
Born again; KJV, RKJNT, NKJV, RNKJV, BWE, RWebster (again; or from above),
EMTV, UKJV, Geneva1599, Webster, KJVPCE, KJV1611, MKJV, AKJV, Bishops,
Geneva1587, Douay, NIV, ESV, LB, ARV, etc.
Nimahsela, Nikodema hi chuan Piantharna chu a hrethiam lo a, Isua hnenah chuan ‘Mi, a tar hnuin engtinnge a pian theih ang? Anu pumah vawihnih lutin a piang thei em ni? tiin zawhna a zawt leh ta a, he zawhna hi zawhna awm tak a ni. Tichuan, Isua chuan chiang zawkin hetiang hian a han sawi a – ‘Tih tak meuhin, tih tak meuhin ka hrilh a che, mi tupawh tui ah leh thlarau ah an pian loh chuan Pathian ramah an lut thei lo ang. Tisaa piang a piang tisa a ni; Thlaraua piang a piang thlarau a ni. I piangthar tur ka tih che hi mak ti suh’ tiin a hmalama kan sawi tawh ang khan Nikodema hian Isua thiltihmak chanchin a hriat hian khawvel thil a ni lo tih a hria a, mak ati a, a hrethiam lo a ni. Chuvang chuan Isua chuan hrethiam turin pianthar angai a, piantharna tur pawh chiang takin a hrilh nghal ta a. Tisaa pianna chu Tisa mi nihna a ni a, Thlaraua pianna chu thlarau mi nihna a nih dan pawh a sawi bawk a ni.
Mizote hian kan sakhaw zirtirna hi kum tam tak kal tawh atanga nghet taka kan vawn leh kan neih a niin kan thinlung hian chu chu thlah mai harsa pawh a ti a. Mingo hoin chanchintha eng hmanga min rawn chhun en takah chuan kan kalphung engkim mai chu min rawn thlak sak an duh ta hial mai khan rah tha tam tak a chhuah nain rah tha lo tak pawh a chhuah tho niin alang a. Incheina kawngah anmahni kan entawn a, vawiin thlengin khawthlang mingo ho incheina chu kan la ngaisangin mawi kan la ti zawk tlat maite hian kan sakhuana thlengin nghawng a nei lo thei lo a, Pathian biak dan thlengin kan lo danglam ta a nih hi. Nimahsela chutiang chu kan thiam tak tak thei chuang si lo a, hlimna sang kan chanah meuh chuan kan dahbo leh tho thin a nih hi.
Pathianni tuka Coat nalh tak ha chunga Necktie sen lar tak kan han awrh bawk hi chuan min hmutu apiangte’n rukru turin min han ngai lo ringawt pawh hi kan lawm a. Langsar taka Bible kan han zakzeh bawk hi chuan kristian tha em emah kan han inngai ringawt te pawh hi a tha lo e tihna ni loin kan kalpelh hi a hun tawh a ni. Chutiang pawnlam incheina ringawt kan buaipui chhungin kan rawngbawlna chu alo thuanawp hman hle tih kan kristian percentage hniam dan atang hian a hriat theih tho bawk si a, zaah za kristian pawh kan inti ngam tawh lo a nih hi. Hei vang takte hian kan pianthar dan hi a dik lo em ni tih tur a ni a, Peih chen chen lal leh chhandamtua pawm ngawt chu a tawk tawh lo ni awm tak a ni. Hetiang lo deuha piantharna hi kan mamawh zawk niin a hriat a, a nih loh vek pawhin Mizo kristiante hian pianthar nawn kan mamawh a ni tih chu hnial rual lohin a chiang reng mai.