Ukrainian foreign affairs ministry chuan Pathianni khan Russia nena an indona kal mekah Moscow chuan sipai 14,700 an chân tawh niin a sawi.
Twitter-ah hei hi tar langin, ‘Ukraine-a Russian sipai thi tawh zat, March 20’ tiin an ziak a. Ministry hian sipai 14,700 an chân tawh a, indona lirthei chi hrang hrang 1,487, thlawhna 96, laipui 230 leh lirthei dang 947 an chân tawh niin a tar lang.
Ukrainian President Volodymyr Zelenskyy-a adviser chuan Ukrainian leh Russian sipaite hi khaw vawtin a hmet a, hma lam pan zel turin an che thei tawh lo ve ve niin a sawi a. “Ni liam taah khan Ukrainian khawpuiah te rocket kah luh a awm tawh lo,” tiin presidential advisor Oleksiy Arestovych hian a sawi.
Russia erawh chuan Kinzhal hypersonic missile hmanga Ukrainian khawpui an kahnaah thil tam tak an tichhia niin an insawi ve thung.
President Zelenskyy-a pisaa mi, Mykhailo Podolyak chuan, “Kinzhal & Bastion system hmangin anmahni bei let ve miah lo khawpuite an kap,” tiin Twitter-ah a tar lang.
Hei hi Ukraine-in ni thum liam ta chhunga missile chak chi hmanga beih an nih thu an sawi vawi hnihna a ni a. A hnuhnung zawkah hian Mykolaiv-a tuialhthei sawngbawlna kah a ni.
Thuneitute chuan Pathianni zing lamah khan thlawhna hmanga rûn tur avanga inralrinna chu darkar khat chuang tihrik a ni.
Russia-in Ukraine a rûn mek hi a chawlhkar lina a ni tawh a. United Nations chuan mi maktaduai 10 vel, Ukraine-a cheng hmun lia \hena hmun khat vel chuan an chenna in chhiat avangin an raltlan tawh.
UNHCR chief Filippo Grandi chuan, “Ukraine-a indona avang hian mi maktaduai 10 vel zet chu an ram chhungah a ni emaw, ram dangah a ni emaw, raltlanin an awm mek,” a ti.
Nunau tawmna kap lehah Russia puh leh
Ukraine ram hian Pathianni khan Russia chuan Mariupol khawpuia civil mite awm khawmna sikul pakhat a kap leh niin a sawi.
Russia hian he khawpui hi an thuhnuaia an dah tawha an insawi a ni a, sikul an kah hi indona avanga tlanchhia mi 400 chuangin tawmna atana an hman niin city council chuan a sawi.
Mariupol-a thil thlengte tar lanna thlalakah chuan in tam tak a chhia a, apartment block tam tak leh sipaite hmun ni lo tih hriat chian tak, damdawi in leh biak in thlengin a chhia tih a lang thei.
Russia erawh chuan civil mite hmun engmah an kap lo tiin a pha ve thung.
Nilainipawh khan khawpui thuneitute chuan Russia-in khawpui lailia theatre chu bomb hmangin a bei niin an lo sawi tawh a. He theatre hi civil mite awmna tih hriat chan, a kawtah pawh Russian tawnga ‘naupang’ tih inziak awm niin an sawi a. Moscow chuan he beihna pawh hi a pha tho.
Theatre chhuat hnuai, lei zawl hnuai hi mi 130 chuang awmna nia sawi a ni a, a hnuah mi 1,300 vel an awm tih sawi leh a ni a, a tam ber hi hmeichhia, naupang leh tar an ni a. Inrinni khan mayor chuan inkahna a la awm reng avangin chhanchhuah hna pawh a thawh hleihtheih loh niin a sawi.
Mariupol-ah hian inbiakpawhna hmanrua a chhe hle a, thil thleng hi finfiah a har hle.
Russian navy officer thi
Ukraine hian Russian navy office lian tak an that leh niin an sawi bawk.
Ukrainian general staff chuan Facebook-ah Captain first rank Andrey Paliy chu an that thu a tar lang a, engtiang chiahin nge an thah erawh a sawi lo va. Moscow pawhin engmah sawi a la nei lo bawk.