Chinese thlawhna, mi 132 zet phur chu an ram chhim lama tlangrama ram ngawah a tla.
China Eastern Airlines Boeing 737 hi Kunming a\anga Guangzhou pan niin Guangxi province-ah tlain a kang zui.
Dam chhuak an awm a beiseiawm loh hle a, hetih lai hian he chanchin ziah lai thleng hi chuan thi zat leh chetsualna an tawh chhan engmah hriat a la ni lo.
Chinese airline-te hi a tlangpui thuin a himin tawhsual an tawk tam lo hle a, chetsualna lian tham an tawn hnuhnung ber chu kum 12 kal ta daih tawh kha a ni.
Flight tracking data a\anga a lan dan chuan thlawhna hian a thlawh san zawng thlak thutin lei lamah a bir thla a, lei a su ta chawrh a ni.
Rikrum a thlena che chhuak chi mi 600 chuangin a tlakna hmun hi an pan a. Kang\helhtute pawh chu a hmun thleng hmasa niin a kangin ram a tihkante pawh an \helh mit tawh.
Tual chhung miten thla an lak, Chinese social media-a an dahah chuan a tlakna laiah hian nasa taka kangin mei khu pawh a chhuak nasa hle a. Thlawhna keh darh them pawh a awm nual.
China Eastern hian hotline siamin chanchin ngaihven duh tan biak theih an ni a. Weibo-a an account-ah an logo rawng thlakin an website pawh a dum leh varin vanduaina tawkte tawrhpuina lantir nan an tidanglam bawk.
Sorkar enkawl airline hi China-a airline lian pathum zinga mi niin China Southern leh Air China nen an lian.
China-a Civil Aviation Administration chuan chhuitute an tirh nghal thu an sawi.
Flight MU5735 hian an ram sanaa chawhnu dar 1:11 (India-a chawhma dar 10:41)-ah Kunming a chhuahsan a, chawhnu dar 3:05-a Guangzhou thleng tura duan a ni.
Flight tracking site-te chuan thlawhna hi darkar khat chuang vansangah a thlawk hman a, a tum ram a thlen hnaih tawh lamah Wuzhou-ah, tlangram, khaw awm dan inthlak thut thut \hina hmun zawna a awm laiin a tla niin an tar lang a. China hian kum khat chhunga tui len hun lai an lut mek a ni.
An tlak lai vel hian chhum chu a zing nasa ngei a; mahse, khaw hmuh harsa chu a awm lo nia sawi a ni.
Flight tracker data chuan minute thum lek chhungin metre sang chuangin a thlawk hniam hman niin a tar lang.
FlightRadar24 data chuan feet 29,100-a a thlawk chu minute hnih leh second 15 hnu lekah feet 9,075-ah a tla hman niin a tar lang a. An awmna lai hriat theih hnuhnung ber chu chawhnu dar 2:22-a feet 3,225-a an awm lai a ni.